Atyraýda perınataldyq ortalyq basshysy jemqorlyqqa jol berdi degen kúdikke ilindi

ATYRAÝ OBLYSY. QazAqparat - Atyraý oblysynyń sybaılas jemqorlyqpen kúres qyzmeti qyzmeti sybaılas jemqorlyqqa jol berdi degen kúdikpen «Atyraý oblystyq perınataldyq ortalyǵy» ShJQ RMK basshysyna qatysty sotqa deıingi tergeýdi bastady.

Bul týraly elimizdiń sybaılas jemqorlyqpen kúres qyzmeti habarlady.

Ol «Atyraý oblysy boıynsha sot-medıtsınalyq saraptama ınstıtýty» RMQ basshylyǵyna bosanǵan áıeldiń qaıtys bolý faktisi boıynsha saraptamanyń oń qorytyndysyn bergeni úshin 300 myń teńge somasynda para aldy, degen kúdikke ilinip otyr.

Atalǵan laýazymdy tulǵanyń bosanýshy áıelderden qolaıly jaǵdaı jasaý úshin birneshe ret para alýǵa qatysy bar-joǵy tekserilip jatyr.

Budan bólek, osy basshynyń laýazymdyq ókilettikterin asyra paıdalaný, 1,5 mln. teńge somasynda demeýshilik qarajatty óz qajettilikterine (shetelde demalýǵa) qoldaný kúdigi boıynsha tergeý júrgizilýde.

Kórsetilgen qarajat dárigerlerdiń biliktiligin arttyrýǵa sheteldik issapar joldamasyn tóleý úshin jeke kompanııanyń dırektorynan demeýshilik kómek retinde alynǵan.

Sot sanktsııasymen kúdikti qamaýǵa alyndy. Sotqa deıingi tergeý jalǵasýda.

Kúdiktige qatysty túpkilikti sheshimdi onyń kinásiniń deńgeıin anyqtaý arqyly sot qabyldaıtyn bolady.