Atyraýda páterdegi seıften 54 mln teńgeni urlaǵan kúdiktiniń isi sotqa joldandy
Budan buryn Atyraýda seıften 56 mln teńgeni urlaǵan úı qyzmetshisiniń ustalǵanyn jazǵan bolatynbyz.
Oblystyq polıtsııa departamenti baspasóz qyzmetiniń málimetinshe, 28 naýryzda saǵat 00:22-de Atyraý qalasynyń 46 jastaǵy turǵyny «102» operatoryna shaǵym túsirgen.
«Úı ıesi bir aptaǵa jýyq úıinde bolmaı, ózge qalaǵa ketken. Keıin úıine kelgeninde seıftegi 54 mln teńgesi urlanǵanyn kórgen. Ury seıften 54 mln teńgeni alyp, 2 mln teńgeni ǵana qaldyrǵan. Urlyqqa baılanysty oqıǵa ornyn jiti teksergen polıtseıler barlyq beınekamerany tekserdi. Biraq, urlyqqa qatysty dáıek tappady. Alaıda, urlyq jasalǵanǵa deıin páterge kelip, qonaq bolyp júrgender arasynda jábirlenýshiniń 1979 jylǵy qurbysy kúdikke ilindi. Tergep-tekserý kezinde kúdiktiniń qomaqty qarajatpen Almaty qalasyna ketkeni anyqtaldy. Polıtsııa qyzmetkerleri kúdiktini ustap, odan 36 mln teńge tárkiledi. Kúdikti óz kinásin tolyqtaı moıyndady» -dep habarlady departamenttiń baspasóz qyzmeti.
Atyraýlyq polıtseıler kúdikti qatysty QR Qylmystyq kodeksiniń 188-babynyń 4-bóligisen tergeý júrgizip, is-qujattaryn sotqa joldady.