Atyraýda Paralımpıada júldegerlerine kólik pen páter kilti tapsyryldy

ATYRAÝ. QazAqparat – Atyraýda Tokıoda ótken Paralımpıada oıyndarynyń kúmis júldegerlerine kólik pen páter kilti tapsyryldy, dep habarlaıdy QazAqparat.

Budan buryn Atyraýǵa Tokıo Paralımpıadasynyń kúmis júldegeri atanǵan paradzıýdoshylar oralǵanyn habarlaǵan edik.

Sol kezde parasportshylarǵa 1 mln teńgeniń sertıfıkaty berilgen bolatyn.

Búgin olarǵa taǵy da 1 mln teńgeniń sertıfıkat tapsyryldy.

Oblys ákimi Mahambet Dosmuhambetov Paralımpıadanyń kúmis júldegerleri Ánýar Sarıev, Temirjan Dáýlet pen Zarına Baıbatınaǵa kólik pen 2 bólmeli páter kiltin tapsyrdy.

Paralımpıada júldegerleriniń bapkeri Jandos Qııanovqa 4 mln teńge berildi.

«Bul – el sporty úshin tarıhı jetistik, qajyrly eńbek pen namystyń, órshil rýhtyń jemisi. Eń bastysy, Atyraý sportshylarynyń el táýelsizdiginiń 30 jyldyǵyna aıryqsha tartýy. Sizder myńdaǵan jastarǵa rýh syılap, qaısarlyqtyń mánin uǵyndyrdyńyzdar» -dedi oblys ákimi Mahambet Dosmuhambetov.

Sondaı-aq, Paralımpıada qatysýshylary Amanjol Janbota, Ǵalymjan Smaǵululy, Erlan Ótepov, Nurlan Dombaev, Erjan Sálimgereev pen olardyń jattyqtyrýshylaryna qurmet kórsetildi.