Atyraýda paraǵa bekire usynǵan azamat 25 aıǵa sottaldy
Atyraý oblysy boıynsha qylmystyq-atqarý júıesi departamenti baspasóz qyzmetinen málim etkendeı, byltyr Isataı aýdandyq sotynyń úkimimen 32 jastaǵy azamat Qylmystyq Kodekstiń 190-babymen kináli dep tanylyp, oǵan 1 jyl merzimge bas bostandyǵyn shekteý jazasy taǵaıyndalǵan edi.
Soǵan baılanysty sottalǵan azamat aıyna 2 ret probatsııa qyzmetine kelip, tirkelip turýy tıis bolatyn. Alaıda, bul talapty oryndamaǵan.
«Sot úkimimen taǵaıyndalǵan májbúrli eńbekti oryndaýǵa qasaqana shyqpady. Atyraý qalasyndaǵy meken-jaıyn teksergen kezde, sottalǵan azamat úıinde bolmady. Keıin sottalǵan azamatqa jazasyn óteýden qasaqana jaltarǵany úshin «eskertý» berilgen», -dep habarlady departamenttiń baspasóz qyzmeti.
Osyndaı zańbuzýshylyqtan soń óziniń túrmege qamalýy múmkin ekenin túsingen sottalǵan azamat probatsııa qyzmetkerine para berýge oqtalǵan.
Aram oıyn júzege asyrý maqsatynda bekire tuqymdas balyq satyp alyp, probatsııa qyzmetkerine bermek bolǵan kezde ustaldy.
«Probatsııa qyzmetkeriniń ınspektory sottalǵan azamattyń aram oıyn basshylyqqa habarlady. Osylaısha, departament qyzmetkerleri jemqorlyq deregine nóldik tózimmen qaraıtyn taǵy bir márte dáleldedi», - dep málim etti baspasóz qyzmetinen.
Sot úkimimen kináli azamat QR Qylmystyq Kodeksiniń 367-babymen kináli dep tanylyp, oǵan 2 jyl 1 aı merzimge bas bostandyǵynan aıyrý jazasy taǵaıyndaldy.
Jaza óteý orny qylmystyq-atqarý júıesiniń ortasha qaýipsiz mekemesi bolyp belgilenli.
Eske sala ketelik, budan buryn Atyraýda jeńgetaılyqpen aınalysqan áıel túrmege qamalǵanyn jazǵan bolatynbyz.