Atyraýda para alǵan ıývenaldy polıtsııa ınspektory sottaldy
Atyraýdaǵy №2 qalalyq sotta ıývenaldy polıtsııa bólimshesiniń kámeletke tolmaǵandar isteri jónindegi ýchaskelik polıtsııa ınspektoryna qatysty sot isi qaraldy. Inspektorǵa QR Qylmystyq kodeksiniń 366-baby 2-bóligimen (Para alý) aıyp taǵylǵan.
«Polıtsııa ınspektory H. azamat S.-ǵa kámeletke tolmaǵan balasyna tárbıeleý jumystaryn tıisti dárejede atqarmaǵany úshin ákimshilik quqyq buzýshylyq boıynsha jınaqtalǵan qujattardy sotqa joldamaı, ońtaıly sheshý, ıaǵnı óndiristen toqtatý maqsatynda 100 000 teńge para alǵan. Inspektordy para alý kezinde sybaılas jemqorlyqqa qarsy is-qımyl qyzmetkeri ustaǵan. Kórsetilgen mán-jaılar men sottalýshynyń kinási kýániń aıǵaqtarymen, JTÁ nátıjelerimen, sot-hımııalyq saraptama qorytyndysymen, zattaı dáleldemelermen dálelin tapty. Sottalýshy ózine taǵylǵan aıyppen tolyqtaı kelisip, bas bostandyǵynan aıyrýmen baılanysty emes jaza taǵaıyndaýdy surady», - dep habarlady sottyń baspasóz qyzmetinen.
Sot ıývenaldy polıtsııa ınspektory H.-ǵa paranyń 30 eselengen somasynda, ıaǵnı 3 mln teńge aıyppul salý túrindegi jaza taǵaıyndady. Úkim shyǵarý kezinde qylmystyq jaýaptylyq pen jazany jeńildetetin mán-jaılar retinde kináni moıyndaýy, shyn ókinýi, buryn sottalmaǵany eskerilgen.
Sondaı-aq ınspektor memlekettik qyzmette laýazym atqarý quqyǵynan ómir boıyna aıyryldy
Sot úkimi zańdy kúshine engen joq.
Eske salaıyq, buǵan deıin Atyraýda taǵy bir tártip saqshysyna qatysty sot úkimi shyqqan bolatyn. Polıtsııa ınspektory qyzmettegi áreketsizdigi úshin 3 jylǵa sottaldy.