Atyraýda para alǵan polıtseı jazalandy
ATYRAÝ. QazAqparat - Atyraýlyq polıtseı 14 myń teńge para alǵany úshin 840 myń teńge aıyppul tóleıdi, dep habarlaıdy «QazAqparat» HAA tilshisi.
«Atyraý qalasynyń № 2 sotynda qylmystyq is kelisimdik is júrgizý tártibimen aıaqtalǵan. Sotta anyqtalǵandaı, sottalýshy K. Atyraý qalasy ishki ister basqarmasynyń jol-patrýldik polıtsııa batalonynyń polıtsııa serjanty bola tura, 2017 jyldyń qarasha aıynda Atyraý-Dossor tas jolynyń boıynda kezekshilikte turǵan kezinde Ózbekstan Respýblıkasynyń azamaty E.-nyń basqarýyndaǵy avtokólikti toqtatqan. Atalǵan kólikti tekserý barysynda ol kóliktiń artqy salonynda otyrǵan Ózbekstan Respýblıkasynyń eki azamatynyń qaýipsizdik beldigin taqpaı otyrǵanyn baıqap, olarǵa qatysty ákimshilik quqyq buzýshylyq týraly hattama toltyratyndyǵy týraly eskertken. Alaıda, hattamanyń ornyna ol júrgizýshi E.-den 14 000 teńge kóleminde para talap etken», - dep habarlaıdy sottyń baspasóz qyzmeti.
Sot úkim shyǵarýda sottalýshynyń kinásin moıyndaýyn eskergen. Ony QR QK 366-babynyń 2-bóligimen kináli dep tanyp, oǵan quqyq qorǵaý organdarynda laýazymdy qyzmetter atqarý quqyǵynan ómir boıyna aıyryp, paranyń alpys eselengen somasy mólsherinde, ıaǵnı 840 000 teńgege aıyppul salý jazasyn taǵaıyndady.
