Atyraýda para alǵan eńbek ınspektsııasy basqarmasynyń basshysy jazalandy

ASTANA. QazAqparat - Atyraý qalasynyń №2 soty para aldy dep aıyptalǵan burynǵy «Atyraý oblysy memlekettik eńbek ınspektsııasy basqarmasy» MM-nyń basshysyna qatysty qylmystyq isti qarady. Bul týraly oblystyq sotyń baspasóz qyzmeti habarlady.

Qylmystyq is materıaldarynda anyqtalǵandaı, sottalýshy S.Ishaı JShS «Unicorn CCC» men «Mıster Doors-Atyraý» JShS kompanııalarynyń qaýipsizdik tehnıkasyna jaýapty tulǵalarynyń bilimin tekserýge arnalǵan baqylaýshy komıssııa tóraǵasy bolyp taǵaıyndalǵan.

Sonymen qatar, S.Ishaı qaýipsizdik tehnıkasy oqýynan ótýshilerdiń sertıfıkattary men kýálikterine qol qoıý úshin kompanııalardyń quryltaıshysynan ár qyzmetker úshin 3 myń teńge para talap etken.

Qos kompanııa quryltaıshysy A.Kım onyń talabymen kelisip, óziniń qyzmetkeri arqyly 294 000 tenge aqshany berip jibergen.

Sol kúni Atyraý oblysy boıynsha sybaılas jemqorlyqqa qarsy qyzmetkerleri jedel-tergeý amaldaryn júrgizý kezinde S.Ishaı qyzmettik bólmesinde para alǵannan keıin ustady.

Sotqa deıingi tergeý barysynda prokýror men sottalýshy S.Ishaıdyń arasynda qorǵaýshy advokat T.Aıanovtyń qatysýymen kináni moıyndaý túrindegi protsessýaldyq kelisim jasaqtalyp, is sotqa joldanǵan.

Sot úkimimen S.Ishaı QR QK-niń 366-baby 2-bóligindegi qylmysty jasaǵany úshin kináli dep tanylyp, oǵan QK-niń 55-baby qoldana otyryp 30 ese túrinde, ıaǵnı 8 820 000 teńge aıyppul jazasy taǵaıyndalǵan. Sonymen birge, múlki tárkilenip, ómir boıy memlekettik qyzmette jumys isteý quqyǵynan aıyryldy.