Atyraýda ózgeniń nesıe kartasyn paıdalanǵan alaıaq ustaldy
ATYRAÝ. QazAqparat –Atyraýda ózgeniń nesıe kartasyn paıdalanǵan alaıaq ustaldy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, Maqat aýdandyq polıtsııa bólimine áıel adam aryzdanyp, belgisiz bireýdiń óziniń nesıe kartasynan aqsha aýdaryp alǵanyn aıtqan.
«1994 jyly týǵan azamatsha nesıe kartasyn joǵaltqanyn mobıldi telefonyna aqsha sheshilgeni týraly habarlama kelgende bir-aq bilgen. Onyń nesıe kartasymen birge pın-kod nómiri qaǵazda jazýly bolǵan. Maqat aýdandyq polıtsııa bóliminiń qyzmetkerlerimen júrgizilgen jedel-is sharalar kezinde kúdikti Aqtóbe oblysynyń turǵyny ekeni anyqtaldy. Qazir 40 jastaǵy azamatshaǵa qatysty QR Qylmystyq Kodekstiń 190-babymen sotqa deıingi tergeý júrgizilýde» -dep habarlady departament bastyǵynyń orynbasary Nurhat Orazbaev
Onyń málimetine súıensek, bıylǵy jyl basynan beri Atyraý oblysynda ınternet-alaıaqtyqtyń 400-ge jýyq deregi tirkelgen. Osy kezge deıin alaıaqtyq qylmystardyń 150-den astamy ashylyp, kináli adamdar jaýapqa tartylǵan.
Eske sala ketelik, budan buryn Atyraýda áıelden 150 myń teńge bopsalaǵan turǵyn ustalǵan edi.
