Atyraýda ózge óńirlerden kelgen jeńil júristi 25 boıjetken esepke alyndy
ATYRAÝ. QazAqparat – Atyraýda ózge óńirlerden kelgen jeńil júristi 25 boıjetken esepke alyndy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetine súıensek, jeńil júriske salynǵan qyzdar «STOP trafık» jedel-profılaktıkalyq is-sharasy kezinde anyqtalǵan. «Atyraý qalasyna elimizdiń ózge óńirlerinen kelip, jezókshelikpen aınalysqan 25 boıjetken azamatsha jezókshelikpen esepke koıyldy. QR Ákimshilik quqyqbuzýshylyq týraly kodeksiniń 449-babymen 34, atalǵan qujattyń 450-babymen 2 adamǵa ákimshilik hattama toltyryldy. QR Qylmystyq kodeksiniń 134, 308, 309-baptarymen qozǵalǵan 3 qylmystyq is tergelip jatyr», -dep habarlady departamenttiń baspasóz qyzmeti.
Іs-shara kezinde 21 jastaǵy boıjetkenniń ǵalamtor jelisinde habarlandyrý berip, jezókshelikpen, bodı massaj qyzmetin kórsetýmen aınalysqany anyqtalǵan. Ol qyzmetiniń júzege asýyna kómektesken 29 jastaǵy áıelge aqysynyń 50% úlesin qolma-qol jáne bank aýdarymy arqyly berip otyrǵan.
Qazir atalǵan derekke qatysty QR Qylmystyq kodekstiń 308-babymen sotqa deıingi tergeý bastaldy. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
Eske sala ketelik, budan buryn Atyraýǵa ózge qalalardan kelgen jeńil júristi qyzdar ustalǵanyn jazǵan edik.
