Atyraýda ózbekstandyq jeti azamat jaýapkershilikke tartyldy
ATYRAÝ. QazAqparat - Atyraý oblysynyń Qyzylqoǵa aýdandyq sotynda Ózbekstan Respýblıkasynyń jeti azamaty jaýapkershilikke tartyldy, dep habarlaıdy QazAqparat tilshisi.
«Ózbekstan Respýblıkasynyń jeti birdeı azamaty Qazaqstan Respýblıkasyna jeke maqsatymen «Beıneý» beketi arqyly kelip, Atyraý qalasy kóshi-qon polıtsııa bóliminen tirkeýden ótip, keıin Atyraý oblysy Qyzylqoǵa aýdany Mııaly aýylyna tirkelgen. Alaıda ishki ister organy qyzmetkeri 21 mamyrda tekserý kezinde sheteldikterdiń kórsetilgen mekenjaıda turmaıtyndyǵyn anyqtaǵan», - dep habarlady oblystyq sottyń baspasóz qyzmeti.
Sondaı-aq, sot otyrysynda Ózbekstan azamattary qujattardy durys toltyrmaýdaǵy kinálaryn moıyndap, ózderiniń Mııaly selosyndaǵy tanystaryna tabys tabý úshin kelgenderin, jańa meken-jaıda tirkelýsiz 10-15 kúndeı turyp jatqandaryn, qujattaryn qaıta tirkeýge tapsyryp qoıǵandaryn aıtyp, qatań jazalamaýdy surady.
Aıta ketý kerek, sot qaýlysymen Ózbekstan Respýblıkasynyń jeti azamaty Qazaqstan Respýblıkasynyń ÁQBtK-niń 517-babynyń 2-bóliginde kózdelgen ákimshilik quqyq buzýshylyqty jasaǵandary úshin kináli dep tanylyp, olardyń árqaısysyna 36 075 teńge kóleminde ákimshilik aıyppul jazasy taǵaıyndaldy.
