Atyraýda otyzdan astam adamnyń 29 mln teńgesin jymqyrǵan alaıaqtyń isi sotqa joldandy
ATYRAÝ. QazAqparat – Atyraýda 35 adamnyń 29 mıllıon teńgesin jymqyrǵan alaıaqtyń isi sotqa joldandy, dep habarlaıdy QazAqparat.
Oblystyq polıtsııa departamenti baspasóz qyzmetiniń aqparatyna qaraǵanda, alaıaq aldymen týystaryn aldaǵan.
«Atyraý qalasynyń turǵyny alaıaqtyq jolymen 35 adamnyń aqshasyn alyp, qaltasyna basqan. Alaıaq aldymen óziniń týystaryn qaladaǵy «Nursaıa» shaǵyn aýdanynan arzan baǵamen páter alyp beremin« dep arbaýyna túsirgen. Jábirlenýshilerden Kaspi.kz qosymshasy arqyly bank kartasyna aqsha aýdartqan, tipti keıbireýlerinen qolma-qol aqsha alǵan. Óziniń qyzmetin 300 myń teńgeden 5 mıllıon teńgege deıin baǵalaǵan. Sóıtip, azamattardyń 29 mln 300 myń teńgesin jymqyrǵan. Al, aldyn ala tólem jasap, páter kútken qala turǵyndary ózderiniń aldanǵanyn alaıaq áıel telefonyn óshirgende bir-aq bilgen» -dep habarlady departamenttiń baspasóz qyzmeti.
Qazir alaıaqtyq kúdigine ilingen 32 jastaǵy áıelge qatysty QR Qylmystyq kodeksiniń 190-babyna sáıkes tergeý amaldary júrgizilip, is sotqa joldandy.
Eske sala ketelik, budan buryn Atyraýda alaıaq áıel turǵyndardy jer telimin áperem dep aldaǵanyn jazǵan bolatynbyz.
