Atyraýda ótken alaman aıtysta oraldyq aqyn bas júldeni jeńip aldy

ORAL. QazAqparat – Atyraýda aqyn, Qazaqstan halyq jazýshysy, Memlekettik syılyqtyń ıegeri Farıza Ońǵarsynovanyń «Jyr juldyzy – Farıza» atty respýblıkalyq aqyndar aıtysy márege jetti, dep habarlaıdy QazAqparat tilshisi.

«Rýhanı jańǵyrý» baǵdarlamasy aıasynda uıymdastyrylǵan jyr dodasyna el óńirlerinen barlyǵy 22 aqyn qatysyp, baq synady.

Solardyń arasynan batysqazaqstandyq Talǵat Myqı sýyrylyp shyǵyp, bas júldeni (2 mln teńge) jeńip aldy.

Belgili jazýshy, baspager, Qazaqstannyń eńbek sińirgen qaıratkeri Mereke Qulkenov bastaǵan qazylar alqasynyń sheshimimen atyraýlyq Shalqarbaı Іzbasarov birinshi (1,5 mln teńge), astanalyq Erkebulan Qaınazarov pen tarazdyq Arýna Kerimbek ekinshi (1 mln teńgeden), almatylyq Rústem Qaıyrtaı, Haziret Berdihan jáne astanalyq Bekzat Asqarov úshinshi (500 myń teńgeden) orynǵa ıe boldy.

Sondaı-aq batysqazaqstandyqtar Orynbek Meńdiqulov pen Muradym Mırlanov yntalandyrý syılyǵyna ilikti.

«Jalpy, aıtys joǵary deńgeıde ótti. Sharaǵa Astanadan «Nur Otan» partııasynyń hatshysy Ǵabıdolla Ospanqulov arnaıy kelip, bastan-aıaq qatysty. Aldaǵy dodalar da partııanyń qoldaýymen ótetin bolady», - dedi QazAqparat tilshisine Talǵat Myqı.

Eske sala keteıik, biz buǵan deıin Atyraýda alaman aıtys ótip jatqanyn habarlaǵan bolatynbyz.