Atyraýda otbasyny qoldaý ortalyǵy ashyldy
ATYRAÝ. QazAqparat – Atyraýda Otbasyny resýrstyq qoldaý ortalyǵy ashyldy, dep habarlaıdy QazAqparat tilshisi.
Bul týraly Atyraý oblysynyń otbasylyq sottary janyndaǵy Otbasyny resýrstyq qoldaý ortalyǵynyń tanystyrylymy barysynda belgili boldy. Jańashyldyq Daǵdarys ortalyqtary odaǵynyń «Baqytty otbasy» jáne QR Joǵarǵy sotynyń «Otbasylyq sot» pılottyq jobalary aıasynda júzege asyrylǵan.
Ortalyqtyń tanystyrylymyna Atyraý oblysy sottarynyń «Otbasylyq sot» pılottyq jobasy boıynsha úılestirýshi sýdıalary men qyzmetkerleri qatysty.
Bul ortalyqtyń negizgi maqsaty - otbasy qundylyqtaryn nyǵaıtý, turmystaǵy problemalardy erte anyqtaý, turǵyndarǵa psıhologııalyq, quqyqtyq, pedagogıkalyq jáne basqa da konsýltatıvtik-ádistemelik kómek kórsetý. Munda psıholog, zańger, áleýmettik qyzmetkerlerdiń kómegin tegin alýǵa bolady.
Jobanyń úılestirýshileriniń aıtýynsha, ortalyqta 7 mamanǵa deıin qyzmet kórsetedi, olar otbasyn qurýǵa nemese nekeni buzýǵa nıetti azamattarǵa psıhologııalyq, medıtsınalyq, áleýmettik, zańgerlik kómekter kórsetedi.
Aıta ketken jón, sońǵy jyldary Qazaqstanda bólek otbasylyq sot qurý máselesi qaralýda, oǵan neke jáne otbasy máseleleri – ajyrasý, balalary bar jaǵdaıda múlikti bólý jáne t.b. jatady.
Otbasyny resýrstyq qoldaý ortalyǵy Atyraýdaǵy Qurmanǵazy kóshesiniń boıynda 8a ǵımaratta ornalasqan. Aptasyna bes kún saǵat 09.00-18.00 aralyǵynda qyzmet kórsetedi. Mamandardyń qabyldaýy men keńester berýi tegin.
Sondaı-aq keńesti táýlik boıyna 150 jáne +7 708 106 0810 telefondaryna soǵý arqyly alýǵa bolady.
