Atyraýda otbasyndaǵy kıkiljińnen soń 7 jasóspirim úıinen ketip qalǵan
ATYRAÝ. QazAqparat – Atyraý qalasynda otbasyndaǵy kıkiljińnen soń 7 jasóspirim úıinen ketip qalǵan, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetine súıensek, polıtsııa qyzmetkerleri 1-5 qańtar aralyǵynda jedel-izdestirý sharalarynyń nátıjesinde birneshe jasóspirimniń úıinen ketip qalǵany anyqtalǵan.
«Atyraý qalalyq polıtsııa basqarmasynyń «102» nómirine jasóspirimderdiń úıinen shyǵyp, joǵalyp ketkeni týraly 7 habarlama tústi. Máselen, 4 qańtar saǵat 00:30 shamasynda 10 jasar jasóspirim anasymen ursysyp, úıinen shyǵyp ketken. Polıtsııa qyzmetkerleri ony kórshi úıden tapty. Sol kúni túngi saǵat 23:00 shamasynda anasyna renjigen 14 jasar jasóspirim úıden ketip, kópirge bet alǵan. Jasóspirimdi polıtsııa qyzmetkerleri taýyp, otbasyna jetkizdi» dep habarlady departamenttiń baspasóz qyzmetinen.
Otbasyndaǵy kıkiljińnen soń úıinen ketip qalǵan jasóspirimderdiń ata-anasyna qatysty QR Ákimshilik quqyq buzý kodeksiniń 442-babynyń 2-bóligimen ákimshilik hattama toltyrylyp, eskertý berilgen.
Eske sala ketelik, budan buryn Atyraýda otbasyndaǵy kıkiljińnen kóp dári iship qoıǵan 12 jasar jasóspirim qutqaryldy.
