Atyraýda otbasyndaǵy kıkiljińnen kóp dári iship qoıǵan 12 jasar jasóspirim qutqaryldy
ATYRAÝ. QazAqparat –Atyraýda dárigerler otbasyndaǵy kıkiljińge baılanysty kóp mólsherde dári iship, ýlanǵan jasóspirimdi qutqaryp qaldy, dep habarlaıdy QazAqparat.
Oblystyq densaýlyq saqtaý basqarmasy baspasóz qyzmetiniń málimetine súıensek, 12 jasar jasóspirim qan qysymyn túsiretin dárini kóp mólsherde iship, ýlanyp qalǵan.
«Dáriden ýlanǵan qyz jaǵdaıy nasharlaǵan kúıde oblystyq balalar aýrýhanasyna jetkizilip, birden jansaqtaý bólimine jatqyzyldy. Jansaqtaý bóliminde jatqan patsıenttiń densaýlyǵy úshin dárigerler 12 saǵat arpalysty. Jaǵdaıy jaqsarǵan soń palataǵa aýystyryldy. Qazir densaýlyǵy qalpyna kelgen jasóspirim úıine shyǵaryldy» -dep habarlady oblystyq balalar aýrýhanasy bas dárigeriniń emdeý isi jónindegi orynbasary Dýlat Sabyrov.
Onyń aıtýynsha, jasóspirim qyzdyń kóp mólsherde dári iship, ýlanýyna otbasyndaǵy kelispeýshilik pen kıkiljiń sebep bolǵan.
