Atyraýda otbasynda janjal shyǵarǵan 34 adam ákimshilik qamaýda otyr
Atyraý oblystyq polıtsııa departamentiniń baspasóz qyzmetinen málim etkendeı, jyl basynan beri turmystyq zorlyq-zombylyqqa qatysty «102» arnasyna 4 097 habar túsken.
«Osyndaı derekke baılanysty Ákimshilik quqyq buzý týraly kodeksiniń 73-babymen (Otbasy-turmystyq qatynastar aıasyndaǵy quqyqqa qarsy áreketter) 1 198 adam jaýapkershilikke tartyldy. Al, 1 365 quqyq buzýshyǵa qorǵaý nusqamasy shyǵaryldy. Onyń ishinde 334 adamǵa erekshe talap qoıyldy. Qorǵaý nusqamasyn buzǵan 96 adam QR Ákimshilik quqyq buzýshylyq týraly kodeksiniń 461-babymen ákimshilik jaýapkershilikke tartyldy. Qazir otbasy-turmystyq qarym-qatynas salasynda quqyq buzǵan 34 adam qabyldaý-taratý ornyna ákimshilik qamaýǵa alyndy», -dep habarlady departamenttiń baspasóz qyzmeti.
Eske sala ketelik, budan buryn Atyraýda daǵdarys ortalyǵyna jyl basynan 24 áıel men 63 bala túskenin jazǵan bolatynbyz.
Jergilikti polıtsııa qyzmeti áıelderdi zorlyq-zombylyqtan qorǵaý tobynyń ınspektory, polıtsııa aǵa leıtenanty Áıgerim Oraqbaevanyń málimetinshe, zábir kórgenderden kúnine 20-25 habar túsedi.
«Jyl basynan otbasy-turmystyq qatynastar aıasynda áıelderge qatysty jasalǵan qylmystar men quqyq buzýshylyqtarǵa baılanysty túsken shaqyrtý 2 myńnan asyp otyr. Otbasynda kıkiljiń shyǵaryp, zábir kórsetken 677 adamǵa qatysty QR Ákimshilik quqyq buzýshylyq týraly kodeksiniń 73-babymen ákimshilik jaýapkershilikke tartyldy», - dep habarlady Áıgerim Oraqbaeva.
