Atyraýda otbasy shyrqyn buzǵan 105 adam esepke alyndy
Oblystyq polıtsııa departamenti baspasóz qyzmetiniń aqparatyna qaraǵanda, Atyraý qalasynda 24-30 qańtarda «Turmys» jedel profılaktıkalyq is-sharasy ótken.
«Іs-sharanyń maqsaty – otbasynda jasalatyn qylmystar men quqyq buzýshylyqtardyń aldyn alý. Osyǵan baılanysty ishki ister organdarynyń esebinde turǵan adamdardy turǵylyqty meken-jaıy boıynsha tekserý júrgizdi. Bir aptada otbasy shyrqyn buzǵan
105 adam esepke alyndy. Onyń ishinde 78 adamǵa qorǵaý nusqamasy shyǵaryldy. Sot qaýlysymen 10 adamǵa erekshe talaptar ornatyldy. Maskúnemdikke salynǵan 8, nashaqorlyq jolǵa túsken 4, qolaısyz otbasy esebine 5 adam qoıyldy», -dep habarlady
departamenttiń baspasóz qyzmeti.
Sondaı-aq, is-shara kezinde túrli quqyqbuzýshylyq jasaǵan 300-ge jýyq adam ákimshilik jaýapkershilikke tartyldy. Turmystyq zorlyq-zombylyq kórgen áıelderge 100-den astam quqyqtyq keńes berildi.
Eske sala ketelik, buǵan deıin Atyraýda turǵylyqty meken-jaıy joq 50-ge jýyq adam arnaıy ortalyqqa jetkizilgenin jazǵan bolatynbyz.
