Atyraýda otandyq tarıhtaǵy Qazaq handyǵynyń mańyzyna arnalǵan halyqaralyq basqosý ótti
«Atyraý oblysy ekonomıkalyq mańyzdylyǵymen qatar, túrki jáne qazaq tarıhyna qatysty mádenı muralarǵa da baı. Máselen, Atyraý qalasynan 30 shaqyrym jerde ornalasqan Saraıshyq Uly Jibek jolyndaǵy mańyzdy saýda jáne mádenıet ortalyǵy bolǵan», - dedi oblys ákimi Baqtyqoja Іzmuhambetov konferentsııa qatysýshylaryna quttyqtyqtaý sózinde.
Qazaq handyǵynyń 550 jyldyǵynyń mańyzy jóninde sheteldik qonaqtar da áńgime qozǵady.
«Ótkenniń qýanyshtary men qaıǵysynan sabaq alamyz. Bul - bizdiń ótken tarıhymyz. Qazaqstandyqtardyń bul mańyzdy ataýly kúndi aýqymdy ótkizip jatqanyna rızashylyǵymdy bildiremin. Ótkendi eske ala otyryp, biz bolashaq týraly oılanamyz. Meniń pikirimshe, bastysy - sizderdiń elderińizde úlken adamı resýrstar bar. Búgingi Qazaqstan - eýrazııalyq qurlyqtaǵy úlken aýmaq, onymen yntymaqtasý ǵanıbet», - dedi Indonezııa Respýblıkasynyń QR-daǵy Tótenshe jáne Ókiletti elshisi Foster Gýlt.
Shvetsııanyń QR-daǵy Tótenshe jáne Ókiletti elshisi Hrıstıan Kamıll óz sózinde Qazaq handyǵy negizin qalaýy shved memleketiniń qurylýymen shamalas, dep atap ótti. Áńgime kúshti adamdar men bıleýishiler jóninde bolyp otyr. Olar el basqarýdy sheber meńgere otyryp, óz halqynyń quqyǵy men erkindigin keńeıtýge tyrysty.
Delı ýnıversıtetiniń professory Indıra Gandı atyndaǵy Ulttyq óner ortalyǵynyń ókili Mansýr Haıdardyń pikirinshe, qazaqtar qola ǵasyry dáýirinde paıda bolǵan.
Al Reseı Ǵylym akademııasynyń Reseı tarıhy ınstıtýtynyń professory Náılá Bekmahanova ǵalymdar E.Bekmahanov pen M.Vıatkınniń eńbekterindegi qazaq handyǵy tarıhy týraly áńgimeledi.
«Qazaqstan tarıhy - biregeı, qýatty. Eýrazııa keńistigindegi Uly Dalanyń tarıhy otyryqshy elderdiń tarıhynan ózgeshe. Uly Dalany basqarýdyń ózindik órkenıetin jasaǵan Qazaq handyǵynyń, petroglıfter arqyly Uly Dalanyń qaıtalanbas kitaphanasyn bederlep ketken qazaq tarıhynyń taǵylymy zor», - dedi Parıjdiń Shyǵys tilderi jáne órkenıetteri ulttyq ınstıtýtynyń professory Katrın Pýjol.
