Atyraýda órtten qaza tapqandardyń otbasyna materıaldyq kómek kórsetiledi
ATYRAÝ. QazAqparat - Atyraýda jataqhanadaǵy órtten qaza tapqandardyń otbasyna materıaldyq kómek kórsetiledi. Bul týraly óńirlik kommýnıkatsııalar qyzmetinde ótken brıfıngte «PSI Story industriya» AF JShS merdigerlik uıymynyń jobalyq menedjeri Erjan Sadyrbalın habarlady.
Atyraý oblysy ákiminiń birinshi orynbasary Saǵyndyq Luqpanovtyń basshylyǵymen jergilikti atqarýshy organdar tarapynan jedel shtab quryldy. Jedel shtab quramyna Atyraý oblysy ІІD tergeý jónindegi orynbasary N.S.Múltaǵýllın, Atyraý oblysy TJD basshysy S.S. Ómirzaqov, Atyraý oblysy TJD basshysynyń orynbasary, azamattyq qorǵaý podpolkovnıgi R.B.Bilálov, órt sóndirý jáne avarııalyq-qutqarý jumystary qyzmetiniń basshysy A.D. Jumanov, Atyraý oblysy TJD Azamattyq qorǵanys jáne tótenshe jaǵdaılar boıynsha oqý jattyǵý beketteri basshysy J.Ý. Berjanov, «PSI Story industriya» AF JShS merdigerlik uıymynyń ókili, Qarabatan kompanııasynyń tapsyrys berýshisi AQSh ókili S.Shamın kirdi.
Atyraý oblysy TJD basshysynyń orynbasary Zamır Berdashevtyń aıtýynsha, qazirgi ýaqytta jumysshylardyń biriniń denesiniń 65 %-yn kúıik shalyp jansaqtaý bóliminde jatyr, onyń denesiniń joǵary jaǵy jáne joǵarǵy tynys alý joldaryn kúıik shalǵan, ekinshi zardap shegýshiniń denesiniń 10-15%-yn kúıik shalǵan, ol jaraqat bólimine ornalastyrylǵan. Olardan bólek tórt jumysshynyń ekeýine alǵashqy medıtsınalyq kómek kórsetilgen, olarǵa ambýlatorııalyq emdeý taǵaıyndalyp qaıtarylǵan.
«Órt tańerteń saǵat 8.10-da shyqqan, 8.19-da órt týraly aqparat «Batys servıs plıýs» Memlekettik emes órtke qarsy qyzmetine kelip tústi. Biz 42 shaqyrym qashyqtyqta boldyq. Bizdiń bólimsheler órt ornyna keldi. Sondaı-aq 10 shaqyrym qashyqtyqta NSOS kompanııasynyń Qarabatandaǵy apattyq qyzmeti ornalasqan, olarda órt sóndirý jumysyna qatysty», - dedi Zamır Berdashev.
«PSI Story industriya» AF JShS merdigerlik uıymynyń jobalyq menedjeri Erjan Sadırbalınniń aıtýynsha konteınerlik jataqhanada bolǵan órt saldarynan qaza bolǵan barlyq adamdar OQO-nyń azamattary, olar jóndeýshi-montajdaýshy bolyp jumys jasaǵan. Kompanııa ókiliniń aıtýy boıynsha qazirgi ýaqytta atalǵan nysannyń jumysy toqtatylǵan. Kompanııa basshylyǵy qaza bolǵandardyń otbasyna materıaldyq ótemaqy tólep, sondaı aq zardap shekkenderdiń emdelýin óz moınyna alady.
Qazirgi ýaqytta órt bolǵan jerde shuǵyl tergeý toby jumys isteýde. Tekserý nátıjeleri keıinirek habarlanatyn bolady.
Aldyn ala boljam boıynsha, órt elektr symdarynyń qysqa tuıyqtalýynan shyqqan. Órt 480 sharshy metr aýmaqty sharpyǵan, órt sóndirýge jeke quramnyń 36 adamy jáne 11 tehnıkasy qatysqan.
