Atyraýda órtenip jatqan qoqys polıgonynyń vıdeosy jarııalandy

ATYRAÝ. QazAqparat - Búgin tańerteń Atyraýdyń kóptegen shaǵyn aýdandaryndaǵy adam tunshyǵatyn ıis qoqys polıgonynan taralǵan, dep habarlaıdy «QazAqparat» HAA tilshisi.

Qalaǵa qaraı ketip bara jatqan baǵan tútininiń kóterilip jatqan vıdeosyn Katerına Landysheva atty qoldanýshy óziniń paraqshasyna jarııalaǵan. Vıdeoda qalalyq qoqys úıindisiniń janyp jatqany aıtylady. Ol jerde ot jetip úlgermegen eski avtomobıl shınalarynyń úımesi jınalǵany kórinip tur.

«Osy aýamen biz jáne bizdiń balalarymyz tynys alyp jatyr», - deıdi jazbanyń avtory.

Atyraý oblystyq TJD habarlaǵandaı, janyp jatqan qoqysty sóndirýmen «Arnaıy avtobaza» qyzmetkerleri aınalysýda. Órt sóndirildi. Alaıda, qoqystan shyǵyp jatqan tútin qatty bolmasa da, toqtaǵan joq. Jel baǵytyn ózgertip, endi tútin qalanyń qarama-qarsy betine qaraı ketip jatyr.