Atyraýda órtenip ketken teatr qysqa deıin jóndeledi

Atyraý oblysynyń ákimi Nurlan Noǵaev Mahambet Ótemisov atyndaǵy akademııalyq qazaq drama teatryn qalpyna keltirý jumystaryn tekserip kórdi. Jóndeý jumystary ótken aptanyń beısenbisinde, ıaǵnı órt bolǵan soń birden bastalǵan. Búgingi tańda nysanda teatrdy óz esebinen qalpyna keltirýge nıet bildirgen 22 kompanııanyń jumysshylary eńbektenýde.  

«Qazir bir mezgilde shatyr, elektr symdaryn qalpyna keltirý, syrtqy abattandyrý, ishki árleý jumystary barlyǵy bir mezgilde júrgizilip jatyr. 12 tehnıka  jumyldyrylǵan, nysanda 200 adam jumys istep jatyr. Bul jumystardan teatr ujymy da tys qalǵan joq, ǵımaratty qalpyna keltirý jumystaryna olar da atsalysýda»,-dedi Atyraý oblystyq qurylys basqarmasynyń jetekshisi Málik Amanov.  

Teatr ǵımaratyn aralaý barysynda óńir basshysy Nurlan Noǵaev teatr ujymynyń kúrdeli jóndeý jumystary kezinde elektr symdaryn qorǵaıtyn qurylǵynyń jańartpaǵanyn synǵa aldy. Óıtkeni órt tap osy jerden bastalǵan. Ákim oqıǵanyń mán-jaıyn anyqtap kináli adamdardyń jazalanýy kerektigin eskertti.   

«Bul oblys turǵyndary úshin úlken synaq boldy. Alaıda halyqtyń bolǵan oqıǵaǵa nemquraıly qaramaı, belsendilik tanytýynyń arqasynda qalpyna keltirý jumystary birden, ıaǵnı órt sóndirilgen soń 2 saǵattan keıin bastaldy. Biz atqarýymyz tıisti jumystar aýqymdy. Sol sebepti asyǵýdyń reti joq, qysqa deıin ýaqyt bar. Mamandardyń boljaýy boıynsha biz qurylys jumystaryn úsh aıda tolyq aıaqtaımyz»,-dedi Nurlan Noǵaev.

Aıta keteıik, aýmaǵy 1,5 myń sharshy metr bolatyn teatr 22 tamyz aıynda órtendi. Órtti sóndirýge 21 tehnıka men 88 órt sóndirýshi jumyldyryldy. Saǵat 17-20-da órt aýyzdyqtaldy, biraq qyzyl jalyn teatrdyń shatyry men taǵy biraz bóligin jalmap ketti. Saǵat 18:18-de órt tolyq sóndirildi. Órttiń shyǵýyna teatrdyń japsarlas ǵımarattarynyń birindegi transformatordyń tuıyqtalýy sebep bolǵan. Bul aldyn ala boljam. Qazirgi tańda órttiń shyǵý sebep-saldaryn anyqtaý úshin arnaıy komıssııa quryldy.    

Avtory. A.Sokolov