Atyraýda órtengen úıden 5 bala qutqaryldy
ATYRAÝ. QazAqparat – Atyraýda kópqabatty turǵyn úıdegi órtten 6 adam, sonyń ishinde 5 bala evakýatsııalandy, dep habarlaıdy QazAqparat.
Oblystyq Tótenshe jaǵdaılar departamenti baspasóz qyzmetiniń málimetine qaraǵanda, órt 30 qazanda saǵat 14:32-de Atyraý qalasynyń A.Qunanbaev kóshesindegi úıde bolǵan.
«Departamenttiń dıspetcherlik pýltine 5 qabatty turǵyn úıden órt shyqqany jóninde habar tústi. Qutqarýshylar oqıǵa ornynan kelgende órt besinshi qabattan shyqqany anyqtaldy. Páterdiń kireberisinde tońazytqysh pen turmystyq zattar órtenip jatty. Órt sóndirýshilerdiń kúshimen joǵary qabattan 6 adam, sonyń ishinde 5 bala evakýatsııalandy. Taǵy 5 adam dalaǵa óz betimen shyqty», - dep habarlady departamenttiń baspasóz qyzmetinen.
Jalyndy sóndirýge Tótenshe jaǵdaılar departamentiniń 15 qyzmetkeri men 4 tehnıkasy jumyldyryldy. Órt saǵat 14:46-da oqshaýlanyp, saǵat 14:51-de tolyqtaı sóndirildi.
