Atyraýda órtengen páterden 5 adam qutqarylyp, bir adam aýrýhanaǵa jetkizildi

ATYRAÝ. QazAqparat – Atyraýda órtengen páterden 5 adam qutqaryldy. Onyń ishinde úsh bala bar. Al, denesin kúıik shalyp, kómirqyshqyl gazyna ýlanǵan bir adam aýrýhanaǵa jetkizildi, dep habarlaıdy QazAqparat.

Oblystyq tótenshe jaǵdaılar departamentiń qoǵammen baılanys tobynan málim etkendeı, órt 17 shilde kúni jergilikti ýaqytpen saǵat 03:05-te tutanǵan.

Atyraý qalasynyń Azattyq dańǵylynda ornalasqan №49-a mekenjaıyndaǵy kóp qabatty úıdiń páteri órtengen. Shakyrtý ornyna jetken órt sóndirýshiler jalpy aýmaǵy 90 sharshy metr bolatyn páterdiń bólmesinde as turmystyq buıymdar órtengenin anyqtady. Jalyn 15 sharshy metr aýmaqty sharpyǵan.

Tótenshe jaǵdaılar departamentiniń órt sóndirýshileri jalyn sharpyǵan páterden 5 adamdy qutqardy. Onyń ishinde 3 balany kireberis dálizindegi baspaldaq arqyly qaýipsiz jerge alyp shyqty.

«Órttiń saldarynan 1991 jylǵy azamatyń denesin kúıik shalyp, onyń ústine kómirqyshqyl gazyna ýlanǵany anyqtaldy. Zardap shekken turǵyn jedel járdem brıgadasymen aýrýhanaǵa jetkizildi», -dep málim etti qoǵammen baılanys tobynan.

Jalyn saǵat 03:40-ta oqshaýlanyp, saǵat 03:53-te tolyqtaı sóndirildi. Órtti sóndirýge tótenshe jaǵdaılar departamentinen 12 kyzmetker men 3 tehnıka tartyldy.

Qazir órttiń shyǵý sebebi anyqtalyp jatyr.

Eske sala ketelik, buǵan deıin Atyraýda eki kúnde «Gaýhartas» turǵyn úı kesheninen úsh ret órt shyqqanyn jazǵan edik.