Atyraýda órtengen páterden 46 jastaǵy er adamnyń máıiti tabyldy
ATYRAÝ. QazAqparat – Atyraýda órtengen páterden 46 jastaǵy er adamnyń máıiti tabyldy, dep habarlaıdy QazAqparat.
Oblystyq tótenshe jaǵdaılar departamenti baspasóz qyzmetiniń málimetinshe, 14 sáýirde Atyraý qalasyndaǵy kóp qabatty turǵyn úıdiń páterinde órt tutanǵan.
«Bul týraly departamenttiń dıspetcherlik pýltine keshe saǵat 18:48-de habar tústi. Órt «Avangard-3» shaǵyn aýdanyndaǵy 5 qabatty úıde bolǵan. Jalyn 15 sharshy metr aýmaqty sharpyǵany anyqtaldy. Órttiń saldarynan úı ıesi – 73 jastaǵy qarııa men onyń 1949 jylǵy áıeli oblystyq aýrýhanaǵa jetkizildi. Er adam dárigerlerdiń tekserýinen keıin úıine jiberildi. Al, onyń áıeli 2-dárejeli kúıikpen aýrýhanaǵa jatqyzyldy. Órtengen páterden úı ıesiniń ІІ toptaǵy múgedek ulynyń máıiti tabyldy. Onyń jasy – 46-da», -dep habarlady departamenttiń baspasóz qyzmeti.
Órt saǵat 19:25-te oqshaýlanyp, saǵat 19:27-de sóndirildi. Jalynnyń tutanýynyń aldyn ala sebebi – otty abaısyz qoldaný. Tilsiz jaýdy aýyzdyqtaýǵa departamenttiń 12 qyzmetkeri men 3 tehnıkasy jumyldyryldy.
Eske sala ketelik, buǵan deıin Atyraýda bir mezette turaqta turǵan eki júk kóligi órtenip ketkenin habarlaǵan edik.
