Atyraýda órtengen páterden 3 bala qutqarylyp, bir adam aýrýhanaǵa jetkizildi

ATYRAÝ. QazAqparat – Atyraýda órtengen páterden 5 adam qutqaryldy. Onyń ishinde úsh bala bar. Al denesin kúıik shalyp, kómirqyshqyl gazyna ýlanǵan bir adam aýrýhanaǵa jetkizildi, dep habarlaıdy QazAqparat.

Oblystyq Tótenshe jaǵdaılar departamentiniń qoǵammen baılanys tobynan málim etkendeı, órt 17 shilde kúni saǵat 03:05-te tutanǵan.

Atyraý qalasynyń Azattyq dańǵylynda ornalasqan №49-a mekenjaıyndaǵy kópqabatty úıdiń páteri órtengen. Shakyrtý ornyna jetken qutqarýshylar jalpy aýmaǵy 90 sharshy metr bolatyn páterdiń as bólmesinde turmystyq buıymdar órtengenin anyqtady. Jalyn 15 sharshy metr aýmaqty sharpyǵan.

Tótenshe jaǵdaılar departamentiniń órt sóndirýshileri páterden 5 adamdy qutqardy. Onyń ishinde 3 balany kireberis dálizindegi baspaldaq arqyly qaýipsiz jerge alyp shyqty.

«Órt saldarynan 1991 jyly týǵan áıel kómirqyshqyl gazyna ýlanyp, denesin kúıik shalǵan. Zardap shekken turǵyn jedel járdem brıgadasymen aýrýhanaǵa jetkizildi», - dep málim etti qoǵammen baılanys tobynan.

Jalyn saǵat 03:40-ta oqshaýlandyrylyp, saǵat 03:53-te tolyqtaı sóndirildi. Órtti sóndirýge Tótenshe jaǵdaılar departamentinen 12 kyzmetker men 3 tehnıka tartyldy.

Qazir oqıǵa sebebi anyqtalyp jatyr.