Atyraýda órt sóndirýshilerge jol bermegen júrgizýshiler jaýapqa tartyldy
ATYRAÝ. QazAqparat - Atyraýda jedel qyzmetterge jol bermegen júrgizýshiler jaýapqa tartylýda. Bir saǵattyń ishinde ǵana polıtseıler nemquraıly 2 avtokólik júrgizýshisine aıyppul saldy, dep habarlaıdy QazAqparat tilshisi.
Búgin Atyraý oblystyq Tótenshe jaǵdaıdar departamentiniń qyzmetkerleri jergilikti polıtseılermen birlesip «Kómekke jol berińiz» ataýymen reıd ótkizdi.
«Atalǵan reıd bir saǵatqa sozyldy. Arnaıy dybys sıgnalyn qosqan órt sóndirý bóliminiń avtokóligi qıyn júrý joldary bar kóshelermen júrip ótti. Órt sóndirýshilerdiń artynan jergilikti polıtsııa qyzmetkerleriniń avtokóligi ilesip otyrdy. Reıdtiń qorytyndysy boıynsha jolda júrý erejeleri talaptaryn buzǵany úshin 2 avtokólik júrgizýshisine aıyppul salyndy», - dep habarlady Atyraý oblystyq TJD-nyń baspasóz qyzmetinen.
Atap ótilgendeı, jedel qyzmet kólikterine jol bermegen júrgizýshiler QR Jol qozǵalysy erejesiniń 598-baby 2-tarmaǵyna saı («Syrt jaǵynda arnaıy tústi-grafıkalyq shemalar, jazýlar jáne belgileýleri bar, bir mezgilde jarqyldaýyq maıagy men arnaıy dybys sıgnaly iske qosylǵan jedel jáne arnaıy qyzmetter kólikteriniń júrýine basymdyq bermeý») jaýapkershilikke tartylatyn bolady.
