Atyraýda órt shyqqan úıdiń 18 turǵyny avtosatymen evakýatsııalandy
ATYRAÝ. QazAqparat – Atyraý qalasyndaǵy SMP-163 shaǵynaýdanynda kópqabatty turǵyn úıdiń balkony órtenip, 18 adam qaýipsiz jerge shyǵaryldy, dep habarlaıdy QazAqparat.
«3 mamyrda jergilikti ýaqytpen saǵat 17:06-de SMP-163 shaǵyn aýdanyndaǵy №5 kóppáterli turǵyn úıde balkon órtendi. Bes qabatty úıdiń 3-shi qabatyndaǵy páterdiń balkony janyp, 4 sharshy metr aýmaqty órt shaldy. Órtti sóndirýge Atyraý oblystyq tótenshe jaǵdaılar departamentiniń 13 qyzmetkeri men 3 arnaýly tehnıkasy tartyldy. Avtosatymen 18 adam qaýipsiz jerge shyǵaryldy. Onyń ishinde 5 bala bar», - dep habarlady oblystyq Tótenshe jaǵdaılar departamentiniń baspasóz qyzmeti.
Órt jergilikti ýaqytpen saǵat 17:24-te tolyqtaı sóndirildi. Oqys oqıǵadan eshkim zardap shekken joq. Qazir órttiń shyǵý sebebi anyqtalyp jatyr.
