Atyraýda órt shyqqan úıden 4 bala qutqaryldy
NUR-SULTAN. QazAqparat – Atyraý oblysynyń polıtseıleri Qulsarydaǵy kóppáterli úılerdiń birinen jańa týǵan náreste men úsh balany shyǵardy. Bul týraly QR ІІM resmı ókili Nurdildá Oraz onlaın brıfıngte aıtyp berdi, dep habarlaıdy QazAqparat.
Órt týraly habar aýdandyq polıtsııa bólimine tańerteń túsken. Oqıǵa ornyna patrýldik qyzmetkerler attanǵan.
«Polıtseıler kelgende úı ishi qoıý tútinge tolǵan edi, sondyqtan qyzmetkerler órt sóndirýshilerdiń kelýin kútpeı, turǵyndardy evakýatsııalaı bastady. Páterlerdiń birinde tartpaly tóbe astyndaǵy symdardyń qysqa tuıyqtalýynan tútin bastalǵan jáne aýaǵa ýly tútin taraı bastaǵan. Munda azdaǵan jeldiń ózi úlken bólmede órt shyǵarýy múmkin edi», – dedi Nurdildá Oraz.
Tórt polıtseı taza aýa jutý úshin kezek-kezek kóshege shyǵyp, qaıtadan kirgen. Olar jańa týǵan náreste men 4, 5 jáne 6 jastaǵy úsh balany alyp shyqqan jáne qarttarǵa úıden shyǵýǵa kómektesti.
«Sodan keıin polıtseıler barlyq páterlerdi birneshe ret tekserip, eshkim qalmaǵanyna kóz jetkizdi. Dárigerler qutqarylǵan turǵyndardy tekserdi, olardyń eshqaısysyna medıtsınalyq kómek qajet bolmady. Keıin órt sóndirýshiler órt oshaǵyn joıdy», - dedi Nurdildá Oraz.
