Atyraýda ormannyń 30 paıyzy qýrap, shalǵyndar taqyrǵa aınaldy - senator
ORAL. QazAqparat - Senatorlar Jaıyq ózeni aıdynynyń ekojúıesin saqtaý jónindegi semınarǵa qatysty, dep habarlaıdy QazAqparat Senattyń baspasóz qyzmetine silteme jasap.
Parlament Senatynyń depýtattary Ǵumar Dúısembaev, Erbolat Muqaev jáne Sársenbaı Eńsegenov Batys Qazaqstan oblysyndaǵy jumys sapary barysynda «Jaıyq ózeni basseıniniń ekologııasyn saqtaýdyń birlesken ınstıtýttyq jəne ekonomıkalyq tetikteri boıynsha usynystar daıyndaý jəne halyqaralyq təjirıbelerdi zertteý məseleleri» atty semınarǵa qatysty.
Parlament Senatynyń depýtaty ári Oral ózeni basseıniniń ekojúıesin saqtaý jónindegi transshekaralyq komıssııanyń múshesi Ǵumar Dúısembaev óz sózinde Atyraý oblysyndaǵy sýǵa qatysty kúrdeli jaǵdaıdy erekshe atap ótti.
«Atyraý oblysynda 600 myńnan astam turǵyn bar, degenmen onda jerasty sý kózi joq, keıbir eldi mekenderde sýdy saǵat boıynsha beredi. Mundaı jaǵdaıda tipti aýyl sharýashylyǵy týraly aıtý múmkin emes. Onda ormannyń 30 paıyzy qýrap qaldy, 5-6 metr tereńdikke deıin qazǵanda sý kórine bastaıdy, aǵash tamyry 2-3 metr tereńdikten ylǵal alady. Sý jaıylyp ketetin shalǵyndar taqyrǵa aınaldy. Balyqtyń ýyldyryq shashatyn 134 orny bolǵan, qazir tek 10-y ǵana qaldy. Jaıyq saǵasy men Kaspııdiń kópshilik jeriniń taıyzdyǵy 30 santımetrge jetti. Bir kezderi Jaıyq keme júzetin ózen boldy, al qazir jaıaýlap keship ótetin halge keldik», - dedi Ǵumar Dúısembaev.
Jaıyqtyń Reseı aýmaǵyndaǵy jaǵdaıy da ońyp turǵan joq. Orynbordan kelgen reseılik delegatsııanyń ókilderi qala aýmaǵyndaǵy Jaıyq laılanyp, baldyr basyp bara jatqanyn aıtty. Reseılik ekologtardyń dereginshe, ózenniń deńgeıi jyl saıyn tómendep barady.
Semınar sońynda «Bizdiń Jaıyq - nash Ýral» qoǵamdyq ekologııalyq birlestigi men «Reseı ekologııalyq qoǵamy» tabıǵı resýrstardy qorǵaý jónindegi jalpyreseılik qoǵamdyq uıymy arasynda tabıǵatty qorǵaý salasyndaǵy memleketaralyq yntymaqtastyq týraly ekijaqty kelisimge qol qoıyldy.
