Atyraýda óner akademııasynyń pedagogtary úılerdiń qabyrǵasyna sýret salady
ATYRAÝ. QazAqparat - Atyraýda akademııa pedagogtary kópqabatty úılerdiń qabyrǵalaryna street-art sýretterin salýda, dep habarlaıdy QazAqparat.
N.Tilendıev atyndaǵy Kishi óner akademııasynyń beıneleý óneri jáne dızaın páni oqytýshylary qaladaǵy turǵyn úılerdiń qabyrǵalaryna sýret salý ıdeıasyn shahar basshysy Alımuhammed Quttumuratulyna aıtqan. Óz kezeginde qala ákimi buǵan qoldaý kórsetken, jobany qarjylandyrýǵa nıetti demeýshiler de tabylǵan.
«Aldymen, oblys ortalyǵynyń Balyqshy yqshamaýdanyndaǵy turǵyn úıdiń qabyrǵasyna Jaıyq ózenindegi sýasty áleminiń sýretin saldyq. Bıyl Mahambet Ótemisulynyń portretin saldyq. Qazir Jastar jylyna qatysty sýretterdi oılastyryp jatyrmyz», - deıdi sýretshi Meıirbek Jaǵypashev.
Oqytýshylar Avangard, Nursaıa, Vokzalmańy, Balyqshy yqshamaýdandaryndaǵy úılerge Qurmanǵazy, Dına, Beıbarys sekildi tulǵalardyń street-art sýretterin salýdy josparlap otyrǵandaryn aıtady. Joba avtorlary qoldaý kórsetkisi keletin demeýshilerdi seriktestikke shaqyrady. Sýretterdi salýǵa túrli-tústi ballondar qoldanylady. Bir jumysty aıaqtaýǵa shamamen 10 kún ketedi.
«Ballondaǵy boıaýlar sýǵa tózimdi, eger úı qabyrǵasy senimdi, aqaýy joq bolsa, sýret te uzaq ýaqyt turady. Bir sýretke 100 ballon ketedi. Jelsiz, ashyq kúnderi jumys isteýge tyrysamyz», - deıdi sýretshi Mıras Janǵojıev.
Aıta keteıik, Atyraýdaǵy úılerge sán berip turǵan sýretterge turǵyndardyń da kózqarastary jaqsy. Sýretshiler jumys qıyn bolsa da, oń nátıjege jáne turǵyndardyń yqylastaryna ıe bolǵannan keıin jańa beıneler jasaýǵa qýana kirisetinderin aıtady.
«Grafıt deımiz be, kórkem sýret deımiz be, bastysy osy jarqyn beıneler Atyraýǵa ásemdik pen jaqsy kóńil-kúı syılaǵanyna senimdimiz», - deıdi sýretshi Asylbek Baqtııar.
