Atyraýda óndiristik qoımany tonaǵan urylar ustaldy

ATYRAÝ. QahAqparat – Atyraýda óndiristik qoımadan 4,5 mln teńgeniń zatyn jymqyrǵan urylar ustaldy, dep habarlaıdy QazAqparat.

Úsh adamnan quralǵan qylmystyq top óndiristik qoımaǵa zańsyz kirip, baǵaly tehnıkalyq qurylǵylardy urlaǵan. Bul týraly 19 qańtarda Atyraý qalasyndaǵy №1 polıtsııa bólimine shaǵym túsken.

«Atalǵan shaǵymǵa baılanysty krımınaldyq polıtsııa bólimshesiniń qyzmetkerleri jedel izdestirý jumystaryn júrgizip, 1985,1986 jáne 1988 jylǵy kúdiktilerdi ustady. Tekserý kezinde kúdiktilerdiń dál osyndaı 7 qylmysqa qatysy bary anyqtaldy. Kúdiktiler aldyn ala sóz baılasýy arqyly iri mólsherde, birneshe ret óndiristik qoımaǵa urlyqqa túsken. Jábirlenýshige jalpy sommasy 4 mln 540 myń teńge zalal keltirgen», -dep habarlady oblystyq polıtsııa departamentiniń baspasóz qyzmeti.

Qazir kúdiktilerge qatysty QR Qylmystyq Kodeksiniń 188-babynyń 3-bóligimen (Urlyq) qylmystyq is tirkelip, tergep-tekserý jumystary júrip jatyr.

Eske sala ketelik, budan buryn Atyraýda 70 kólik júrgizýshisi 1 mln 743 myń teńgeniń aıyppulyn tólemegenin jazǵan edik.