Atyraýda on adam 200 myń, eki adam 3 mln teńgeniń aqshalaı júldesine ıe boldy
ATYRAÝ. QazAqparat – Atyraýda vaktsına saldyrǵan on adam 200 myń, eki adam 3 mln teńgeniń aqshalaı júldesine ıe boldy, dep habarlaıdy QazAqparat.
Buǵan deıin Atyraýda júlde qory 40 mıllıon teńgeni quraıtyn aqshalaı utys oıyny bastalǵan bolatyn. Keıin vaktsına alǵan on adam 200 myń teńgeniń aqshalaı utysyna ıe bolǵanyn habarlap edik.
«Azamattyq Alıans» ZTB koronavırýs ınfektsııasyna qarsy vaktsına alǵandar arasynda uıymdastyrǵan aqshalaı utys oıyny jergilikti telearnanyń tikeleı efırinde ótkizildi. Utys oıynyn 4 táýelsiz baqylaýshy qadaǵalady.
«Úshinshi ret ótkizilgen utys oıynyna vaktsına alǵan 35 244 adam qatysty. Onyń ishinde kezdeısoq san arqyly tańdalǵan on adam 200 myń teńgeniń aqshalaı sertıfıkatyn utyp aldy. Bul jolǵy utys oıynynyń bas júldesi – 3 mln teńgeniń eki sertıfıkaty. Ony shilde aıynda vaktsına alǵandardyń arasynan Qurmanǵazy aýdanynyń eki turǵyny ıelendi» -dep habarlady oblystyq densaýlyq saqtaý basqarmasynyń baspasóz qyzmeti.
Tikeleı efırde 3 mln teńgeni utyp alǵannyń biri – Násıpolla Ǵarıfov. Onyń otbasynda 5 bala bar. Al, ekinshisi – jeke kásipker Aıman Jarmuhambetova.
