Atyraýda oqýshynyń soqqyǵa jyǵylǵanyn habarlamaǵan mektep dırektory jazalandy
Atyraý qalasynyń prokýrory Arshat Taıtýllınniń aıtýynsha, 25 sáýirde №36 mekteptiń 10-synyp oqýshysy soqqyǵa jyǵylǵan.
Soǵan baılanysty dene jaraqatyn qasaqana keltirý deregimen QR Qylmystyq kodeksiniń 107-baby, 2-bóliginiń 8-tarmaǵymen sotqa deıingi tergeý júrip jatyr.
«Jedel tergeý sharalary kúdikti retinde 11-synyp oqýshysyn anyqtady. Oqıǵanyń búkil kýágerinen jaýap alyndy. Qazir qylmystyq is boıynsha qajetti tergeý áreketteri, onyń ishinde sot-medıtsınalyq saraptama jasalyp jatyr. Kámeletke tolmaǵandarǵa qatysty zańǵa qaıshy áreketterdi habarlamaǵany úshin mektep dırektory Ákimshilik quqyq buzý týraly kodeksiniń 127-1-babynyń 1-bóligimen ákimshilik jaýapqa tartyldy», - deıdi Arshat Taıtýllın.
Qazir qalalyq prokýratýra ýákiletti organdarmen birge kámeletke tolmaǵandar arasynda qabyldanǵan profılaktıkalyq jumystardyń tolyqtyǵyn tekserip jatyr.
Oblystyq balalar aýrýhanasynyń dırektory Nurqabyl Aıtmuhambetovtiń deregine súıensek, naýqas emdeý ornyna 25 sáýirde saǵat 17:00 shamasynda túsip, lor bólimine jatqyzylǵan.
«Naýqasty shuǵyl operatsııalyq kómekti qajet etpeıtindigine baılanysty Batys Qazaqstan oblystyq aýrýhanasynyń mamandaryna jiberý kelisildi. Alaıda, ata-anasy 26 sáýirde saǵat 12:00-de balasyn qolhatpen shyǵaryp alyp, Oralǵa ushaqpen alyp ketti», -deıdi Nurqabyl Aıtmuhambetov.
Eske sala ketelik, budan buryn Atyraýda ájesinen adasyp qalǵan 5 jasar bala tabylǵanyn habarlaǵan edik.
