Atyraýda oqýshylardyń teris qylyǵynan keıin búkil mektepterde ata-analar jınalysy ótedi
Atyraý oblysy ákiminiń orynbasary Jasulan Bısembıevtiń málimetinshe, 17-21 qazan aralyǵynda oblystyń barlyq mektebinde ata-analar jınalysy ótedi.
Buǵan oqýshylar tarapynan órsekel áreketterdiń qaıtalanýy sebep bolyp otyr.
«Sońǵy kezde óńir jurtshylyǵy orta mektep oqýshylarynyń minez-qulqyna alańdaýshylyq bildirip otyr. Óıtkeni, oqýshylar tarapynan birneshe ret óreskel áreketter tirkeldi. Ata-analar jınalysyn ótkizýge Atyraý qalasyndaǵy orta mekteptiń birinde «bomba qoıylǵany» týraly jalǵan habar da sebep boldy. Jalǵan habar taratqan sol mekteptiń oqýshysy – 2008 jyly týǵan jasóspirim ekeni anyqtaldy. Áleýmettik jelide taǵy bir mekteptiń oqýshylarynyń elektrondy temeki tartyp turǵan vıdeosy tarady. Mundaı oqıǵalardyń barlyǵy jurtshylyqty alańdaýshylyǵyn týǵyzdy», -deıdi Jasulan Bısembıev.
Oblystyq polıtsııa departamenti baspasóz qyzmetiniń málimetinshe, budan birneshe kún buryn Atyraý qalasynyń mańyndaǵy aýyldyq okrýgtiń birinde mektep oqýshylaryna energetıkalyq qospasy bar untaq satylǵany anyqtalǵan. Mekteptiń joǵary synybynda oqıtyn oqýshylar kishkentaı balalardan aqsha surap, álimjettik kórsetetini týraly aqparat tarady.
Al, Jylyoı aýdanynyń ortalyǵy – Qulsary qalasynda jasóspirimder «Qyzǵaldaq» balabaqshasyna jasyrynyp kirip, oıynshyqtar men gúlderdi shashyp, astan-kesteńin shyǵarǵan.
Osy derekke qatysy bar 9 jasóspirim ustaldy. Olar – 6-7-synypta oqıtyn oqýshylar.
«Atyraý oblysynyń mektepterinde oqýshylardyń ata-analarymen kezdesý ótkizýge sheshim qabyldandy. Kún tártibinde quqyq buzýshylyqtardyń aldyn alý, tártip pen tárbıe máseleleri talqylanady», -dep málim etti Jasulan Bısembıev.
Eske sala ketelik, buǵan deıin Atyraýda elektrondy temeki tartqan oqýshylardyń ata-analaryna aıyppul salynǵanyn, 14 jasar oqýshy mektepke bomba qoıylǵany týraly jalǵan habar bergenin jazǵan bolatynbyz.
