Atyraýda oqýshylardyń respýblıkalyq olımpıadasy ótip jatyr
ASTANA. QazAqparat - Atyraýda jaratylystaný-matematıka pán baǵyttary boıynsha 20-synshy respýblıkalyq olımpıada bastaldy. Oǵan 800-ge jýyq oqýshy qatysýda, dep habarlaıdy Atyraý oblystyq Óńirlik kommýnıkatsııalar qyzmeti.
Keshe Atyraýda atalǵan respýblıkalyq olımpıadanyń ashylý saltanaty ótti. Olımpıadaǵa elimizdiń 14 oblysynan, Astana, Almaty qalalarynan, respýblıkalyq bilim berý uıymdarynan jáne Nazarbaev zııatkerlik mektebinen 19 komanda qatysýda.
Jaıyq sport kesheninde ótken olımpıadanyń ashylý saltanatyna oblys ákimi Nurlan Noǵaev arnaıy kelip, oqýshylarǵa sáttilik tiledi.
«Osyndaı is-sharalardy ótkizý memleket basshysynyń ar adamnyń áleýetin arttyryp, adamı kapıtaldy baıyta otyryp, qazaqstandyqtardyń ál-aýqatyn jaqsartýǵa baǵyttalǵan mindetterin júzege asyrýdyń nátıjesi bolyp tabylady. Nursultan Nazarbaev bilim berýdi damytýǵa erekshe kóńil bóledi. Sizderdiń endigi mindetterińiz sol múmkindikti utymdy paıdalanyp, bilimderińizdi ári jetildire otyryp, básekelestikke saı bolatyn azamat bolyp tárbıelenýge óz-ózderińizdi daıyndaý. Ol úshin barlyq jaǵdaı jasalǵan. Kishkentaı jeńistiń barlyǵy úlken jeńistiń bastamasy ekenin esten shyǵarmańyzdar»,- dedi Nurlan Noǵaev.
800-ge jýyq oqýshy qatysatyn respýblıkalyq olımpıada 20 naýryzǵa deıin jalǵasady. Olımpıadadan tys ýaqytta oqýshylar qaladaǵy bilim ordalarymen, mádenı-tarıhı oryndarmen tanysyp, psıhologııalyq trenıngter men sporttyq sharalarǵa qatysady.
