Atyraýda oqýshylardy tasymaldaıtyn 23 avtobýs satyp alýǵa 1,1 mlrd teńge bólingen
Atyraý oblysynyń ákimi Serik Shápkenovtiń málimetinshe, jańa oqý jylynda 143 myń oqýshy mektepke keledi. Bıyl bilim ordalarynyń materıaldyq-tehnıkalyq bazasyn nyǵaıtýǵa 4 mlrd 544 mln 527 myń teńge bólingen.
«Ótken jyly oqýshylardy 49 avtokólik tegin tasymaldady. Endi jańa oqý jylynda 60 eldimekendegi 4 561 oqýshyny tasymaldaý josparlanyp otyr. Qosymsha 23 avtobýs satyp alý úshin 1,1 mlrd teńge bólindi. Kólikter qyrkúıek aıynda oqýshylardy tasymaldaýdy bastaıdy. Oqýlyq jáne oqý-ádistemelik keshendermen qamtý úshin 1 676 370,0 myń teńge qaraldy», - deıdi Serik Shápkenov.
Ákimniń aıtýynsha, oqýlyqtar 25 tamyzǵa deıin tolyqtaı jetkiziledi.
«Oblystaǵy túpkilikti sheshilgen máselelerdiń biri – 1-4 synyp oqýshylaryn tolyq, 5-11 synyptaǵy áleýmettik az qamtylǵan otbasy balalaryn tegin ystyq tamaqpen qamtý. Atalǵan shara jańa oqý jylynan bastap júzege asyrylady. Bıyl 21 mektepte ınternet jyldamdyǵyn arttyrý josparlanyp, 108 332,1 myń teńge bólindi. Nátıjesinde sekýndyna 20 Mbıt jáne odan joǵary jyldamdyqtaǵy ınternetpen qamtamasyz etý kórsetkishi 43,3% bolady», - dep málim etti Serik Shápkenov.
Bıyl Atyraý oblysynda 25 mektepti jańǵyrtý kózdelgen. Qazir 5 mekteptegi jumys tolyq aıaqtalǵan. Al 20 mektepti jańǵyrtý birneshe baǵytta jumysty jyl sońyna deıin aıaqtaý josparlanǵan.
Eske sala ketelik, buǵan deıin Atyraý oblysyndaǵy mektepterde sport zaly men ashana joq ekenin habarlaǵan edik.
