Atyraýda oqýshylar sýǵa batyp bara jatqan dostaryn qutqaryp qaldy
ATYRAÝ. QazAqparat - Atyraý oblysynda bes oqýshy sýǵa batyp bara jatqan dostaryn qutqaryp qaldy, dep habarlaıdy «QazAqparat» HAA tilshisi.
«Atyraý oblysy Mahambet aýdany Tańdaı aýylynda turatyn 6 synyp oqýshylary Baqsaı kanalyna sýǵa túsýge barǵan. Olardyń ishinde sýda júzýdi bilmeıtin Nursat bul kemshiligin dostarynan jasyrǵan. Kezekti súńgý kezinde qatty aǵysta qalyp qoıǵan onyń joǵalyp ketkenin birden ańǵarǵan dostary dereý izdeýge kirisken», - dedi Batys óńirlik aeromobıldi jedel-qutqarý jasaǵynyń ókili Móldir Shııapova.
Onyń aıtýynsha, uldardyń arasyndaǵy Begaly esimdi bala Nursatty sýdyń astynan alyp shyǵyp, Shyńǵys, Azamat, Naýryzbek jáne Erik esimdi dostarynyń kómegimen jaǵaǵa jetkizgen. Olar es-túsinen aıyrylǵan dostarynyń júrek tusyn ýqalap, qoldan dem aldyrý jattyǵýlaryn jasaǵan.
«Biraz ýaqyttan keıin Nursat tynys ala bastady, - deıdi Begaly Tóleý. - Sol ýaqytta onyń ata-anasy men dárigerler de kelip jetti».
Nursat jedel járdem qyzmetimen aýdandyq aýrýhanaǵa jetkizildi. Bir táýlikten keıin ǵana ol óz-ózine kelip, sóıleı bastady. Qazirgi ýaqytta Nursattyń ómiri men densaýlyǵyna tóngen qaýip joq.
