Atyraýda oqýshylar mingen kólik apatqa ushyrap, bir adam qaza tapty
ATYRAÝ. QazAqparat - Atyraý oblysynda oqýshylar mingen kólik apatqa ushyrady, dep habarlaıdy QazAqparat.
Atyraý oblystyq polıtsııa departamenti baspasóz qyzmetiniń habarlaýynsha, jol apatynan bir adam kóz jumyp, toǵyz jolaýshy jaraqat alǵan.
Oqıǵa juma kúni «Atyraý - Oral» tasjolynda, Inder aýdanynda bolǵan. Opel Vectra jáne Lada kólikteri soqtyǵysyp qalǵan. Opel Vectra kóliginiń 1987 jyly týǵan júrgizýshisi oqıǵa ornynda qaıtys boldy. Taǵy toǵyz adam zardap shekti. Onyń ishinde bes oqýshy bar. Barlyǵy jedel járdemmen Inderbor aýylyndaǵy aýdandyq aýrýhanaǵa jetkizildi.
Polıtsııa departamentiniń málimetinshe, alǵashqy kómek kórsetilgen soń barlyǵy úıine jiberilgen.
Qylmystyq kodekstiń 345-baby 3-bólimi boıynsha qylmystyq is qozǵaldy.
