Atyraýda oqýdy jańa bitirgen erli-zaıypty dárigerler koronavırýspen kúreske jumyldy

ATYRAÝ. QazAqparat - Internatýra jáne rezıdentýra bitirip kelgen 55 maman Atyraý qalasyndaǵy jáne aýdandardaǵy emdeý mekemelerine jumysqa kiristi, dep habarlaıdy Atyraý oblystyq kommýnıkatsııalar qyzmeti.

Jas mamandarmen kezdesý barysynda aımaq basshysy Mahambet Dosmuhambetov medıtsına salasynyń aýyr kezeńdi bastan ótkerip jatqandyǵyn atap ótti.

«Qazirgi ýaqytta oblysta 9000 dáriger bolsa, onyń ishinde 2000 medıtsına mamany pandemııamen kúreske jumyldyrylyp otyr. Onyń ústine óńirde 278 dáriger jetpeıdi. Búgingi tańda Jylyoı, Qurmanǵazy aýdandarynda aýrýhanalar salynýda. Sonymen birge, Atyraý kardıoortalyǵyna japsarlas ǵımarat ashylady. Medıtsına jáne bilim salasy mamandaryn daıyndaýǵa qashan da basymdyq beremiz»,- degen Atyraý oblysynyń ákimi Mahambet Dosmuhambetov jas mamandardy áleýmettik qoldaý jalǵasatynyn aıtty.

Atyraý oblysy densaýlyq saqtaý basqarmasynyń basshysy Nurlybek Qabdyqaparov buǵan deıin habarlaǵandaı, aımaqqa jalpy sany 122 jas maman keledi. Qazirgi kezde olardyń aldy jumysqa kirisip ketken.

«Koronavırýs indetine baılanysty, jas mamandardan qosymsha kómek bolady dep kútilýde. Mamandardyń jalaqysy zań sheńberinde kórsetilgen deńgeıde tólenedi. Eger ınfektsııalyq nemese provızorlyq statsıonarǵa jumysqa kirisse, mınıstrlik buıryǵyna sáıkes ústemeaqy bólinedi. Emdeý mekemeleri basshylarynan túsken suranysqa saı mamandar úımen qamtamasyz etiledi»,- deıdi Atyraý oblysynyń densaýlyq saqtaý basqarmasynyń basshysy Nurlybek Qabdyqaparov.

Nasyr men Albına Ońǵarbaevtar - qyzyl aımaqta jumys istep jatqan otbasylyq jup. Dárigerlikti tańdaǵan jas mamandar - Aqtóbeniń týmasy.

«Jumysqa 20 shilde kúni kiristik. Atyraý oblystyq aýrýhanasy janyndaǵy provızorlyq statsıonardamyz. Naýqastardy qabyldap, jaǵdaıyn baqylaımyz. Aýrýyna qatysty qujattar toltyramyz. Qazirgi ýaqytta oblystyq ákimdik jaldap bergen «Dostyq» qonaq úıinde turamyz. Aýrýhanaǵa avtobýs tasymaly uıymdastyrylǵan. Búginde ahýal turaqtalyp, naýqastar sany azaıýda. Dese de, osyndaı qıyn jaǵdaıda halyqqa kómek kórsetip jatqanymyzǵa qýanyshtymyz», - deıdi Nasyr men Albına Ońǵarbaevtar.

Oblystyq aýrýhananyń provızorlyq aýrýhanasynda jumys istep jatqan taǵy bir maman - Dmıtrıı Lı. Hırýrg mamandyǵyn bitirgen Dmıtrıı Lı jataqhanaǵa ornalasqanyn aıtady.

«Úsh mezgil as-aýqatpen, qajetti qorǵanys kıim-keshekpen qamtamasyz etti. Tájirıbemiz bolmaǵandyqtan tálimgerlermen keńese otyryp, em-sharasyn taǵaıyndaımyz»,- deıdi Dmıtrıı Lı.

Aıta ketelik, qazirgi ýaqytta Aqtóbe medıtsınalyq akademııasyn támamdaǵan 53 mamannyń 11-i statsıonarlyq aýrýhanaǵa, 27-si bastapqy medıtsınalyq kómek kórsetetin emhanalarǵa jumysqa kiristi.

Qalǵan 15 maman aýdandarǵa jiberildi.