Atyraýda ókpeni jasandy jeldetýge arnalǵan qansha apparat bar
ATYRAÝ. QazAqparat – Atyraý oblysynda ókpeni jasandy jeldetetin 115 apparat bar, dep habarlaıdy QazAqparat.
Oblystyq densaýlyq saqtaý basqarmasynyń basshysy Nurlybek Qabdyqaparovtyń málim etýinshe, Densaýlyq saqtaý mınıstrliginiń esebinde kórsetilgen 12ókpeni jasandy jeldetý apparaty Atyraýdaǵy ınfektsııalyq statsıonardyń jansaqtaý bóliminde ornatylǵan.
«Qazirgi ýaqytta Atyraý qalasyndaǵy ınfektsııalyq statsıonarda 12 reanımatsııalyq kereýet bar. Soǵan sáıkes, 12 reanımatsııalyq kereýet 12 ókpeni jasandy jeldetý apparatymen jabdyqtalyp otyr. Al, oblystyq aýrýhanadaǵy provızorlyq ortalyq 14 ókpeni jasandy jeldetý apparatymen jabdyqtaldy. Sonymen birge, perınataldyq ortalyq, oblystyq balalar aýrýhanasy da osyndaı apparattarmen qamtamasyz etildi» - deıdi Nurlybek Qabdyqaparov.
Onyń aıtýynsha, Atyraý oblysyndaǵy emdeý oryndarynda 115 ókpeni jasandy jeldetý apparaty bar. Aldaǵy ýaqytta mundaı apparattar sany demeýshiler esebinen kóbeıedi dep kútilýde.
