Atyraýda oblystyq aýrýhana kúrdeli operatsııalardy jasaýǵa daıyndalýda

ATYRAÝ. QazAqparat –Atyraý oblystyq aýrýhanasy tamyzdyń ortasynda kúrdeli otalardy jasaýdy bastaǵaly otyr. Bul týraly aýrýhananyń bas dárigeri Erbol Imanǵalıev málime etti, dep habarlaıdy QazAqparat.

​Oblystyq densaýlyq saqtaý basqarmasy baspasóz qyzmetiniń málimetine súıensek, atalǵan aýrýhanada ınfektsııalyq oryndar sany azaıtylyp, josparly emdeý sharalaryn júrgizýge daıyndalýda. Qazir aýrýhanada «taza aımaq» jasaqtalyp jatyr.

«Jaqynda hırýrgııalyq, nevrologııalyq, sondaı-aq, ońaltýdy qajet etetin beıindi naýqastardy emdeı bastaımyz. Tamyz aıynyń ortasynda kúrdeli operatsııalar jasaýdy josparlap otyrmyz», - deıdi Atyraý oblystyq aýrýhanasynyń bas dárigeri Erbol Imanǵalıev.

Onyń aıtýynsha, aýrýhana shilde aıynyń basynan beri ​ 400 oryndyq ınfektsııalyq statsıonarǵa beıimdelgen edi. Qazir munda qaýipti indet juqtyryp túsken naýqastardyń sany azaıǵan.

«Buryn qabyldaý bólimshesine táýligine ınfektsııalyq aýrýmen 60-qa jýyq naýqas túsetin. Qazir táýligine 15-ke jýyq naýqasty qabyldaýdamyz. Búgingi kúni ınfektsııalyq statsıonarda em qabyldap jatqan 137 naýqas bar. Endi tamyz aıynan bastap 200 kerýetke ​josparly túrde emdeletin naýqastardy qabyldaýǵa daıyndalýdamyz», - dedi Erbol Imanǵalıev.

Atalǵan​ ınsýlttik, zaqym-jaraqat bólimsheleri indet tarap jatqan kezde de jumysyn toqtatpaı, naýqastardy úzilissiz qabyldap otyr.

Eske sala ketelik, buǵan deıin Atyraý aýrýhanalary tamyzda josparly emdeýdi bastaıtynyn jazǵan edik.