Atyraýda oblys ákiminiń birinshi orynbasary ustaldy

ATYRAÝ. QazAqparat – Atyraýda oblys ákiminiń birinshi orynbasary ustaldy, dep habarlaıdy QazAqparat tilshisi.

Atyraý oblysynyń Sybaılas jemqorlyqqa qarsy is-qımyl departamentiniń baspasóz qyzmetiniń habarlaýynsha, búgin Atyraýda oblys ákiminiń birinshi orynbasary Nurlan Taýbaev pen oblystyq qurylys basqarmasynyń basshysy Tımýr Basarov ustaldy.

Olar aımaqtyń ınfraqurylymdyq damýy men jol qurylysymen aınalysatyn kompanııalardyń birinen 182 mıllıon teńge kóleminde para aldy degen kúdikke ilindi. Tergeý múddesi úshin istiń mán-jaıy áli ashylǵan joq.

Aıta keteıik, Nurlan Taýbaev oblys ákiminiń birinshi orynbasary laýazymyna mamyr aıynda, al Tımýr Basarov Atyraý oblysy qurylys basqarmasynyń basshysy qyzmetine maýsym aıynyń sońynda taǵaıyndalǵan bolatyn.