Atyraýda «Nurly jer» baǵdarlamasy boıynsha ıpoteka berile bastady
Bul týraly Atyraý oblystyq óńirlik kommýnıkatsııalar qyzmetinde ótken brıfıngte «Qazaqstan ıpotekalyq kompanııasy» ıpotekalyq uıymy» AQ aımaqtyq ókildiginiń dırektory Álimjan Dabysov málimdedi.
Turǵyn úı qurylysyna qatysty «Nurly jer» jańa baǵdarlamasynyń sheńberinde 2016 jyldan bastap kommertsııalyq bankterdiń ıpotekalyq qaryzdaryn sýbsıdııalaý baǵyty qarastyrylǵan. Qaryz alýshynyń sýbsıdııalanatyn qaryz boıynsha túpkilikti tólemi 10 paıyz bolady, qalǵan bóligin QIK tóleıdi.
Aıta ketý kerek, qaryz berý men rásimdeý isinde bankter eshqandaı komıssııa ustamaıdy. Atalǵan baǵdarlama boıynsha tek bastapqy baspana alýǵa ǵana múmkindik bar, ol úshin turǵyn úı qunynyń 30 paıyzy alǵashqy jarna retinde tólenedi, qalǵan qaryz 10 jylǵa sýbsıdııalanady. Almaty men Astanada nesıeniń sýbsıdııalanatyn joǵary mólsheri 20 mln teńge, oblystarda - 15 mln teńge.
«Búginde ıpoteka naryǵynda mólsherleme óte joǵary. Bankterde «uzaqqa beriletin» aqsha joq, bolsa da onyń quny qymbat turady. Bul qaryz alýshy úshin de, bank úshin de tıimsiz. Osy máseleni sheshý úshin ıpotekalyq qaryzdar boıynsha mólsherlemeni sýbsıdııalaý baǵdarlamasy qolǵa alyndy. Qaryz alýshy ıpotekany arzanǵa alady, al bank óz mólsherlemesin memlekettik sýbsıdııalaý arqyly alady. Osyndaı mehanızm ıpotekalyq naryqty damytýǵa, turǵyn úı qurylysyna qarqyn berýge, jańa jumys oryndarynyń ashylýyna múmkindik beredi. Biz qarjylyq operator retinde baǵdarlamanyń jumys isteýine, el ekonomıkasy men halyqtyń ıgiligine paıda ákelýge bar kúshimizdi salamyz», - deıdi «Qazaqstan ıpotekalyq kompanııasy» ıpotekalyq uıymy» AQ Atyraý aımaqtyq ókildiginiń dırektory Álimjan Dabysov.
Búginde «Nurly jer» baǵdarlamasy boıynsha Atyraýdaǵy tórt bank ıpotekany sýbsıdııalaýǵa ótinish qabyldap jatyr. Olar: «Bank Tsentr Kredıt», «ATF Bank», «Sberbank» jáne «Bank VTB». Jýyrda «Bank RBK» men «Nurbank» da baǵdarlamaǵa qosylady dep josparlanýda.
Atyraý qalasy boıynsha «Bank Tsentr Kredıtke» jalpy somasy 32 888 900 teńge bolatyn 4 ótinish túsken. Onyń barlyǵy da maquldandy.
Jańa baǵdarlamanyń jaqsylyǵyn kórgen otbasylardyń biri - Azamat pen Anna. Aden atty uldary men Agnııa atty qyzdary bar januıa Atyraýǵa Reseıden tórt jyl buryn qonys aýdarǵan. Osy ýaqyt boıy páter jaldap kelgen olar baspanaǵa ıe bolýdyń barlyq múmkindikterin qarastyrypty. Osy jyldyń basynda bir bankten kezdeısoq «Nurly jer» baǵdarlamasy týraly aqparatty kóredi. Kóp oılanbaı, baǵdarlamaǵa qatysýǵa bel býǵan otbasy «Nursaıa» yshqamaýdanynan jańa da jaıly páter aldy. «Bank qyzmetkerlerimen sóılestik, olar keńes berdi. Qujat jınap, bir-eki apta jaýap kúttik. Baspanaly bolatynymyzda estigende qatty qýandyq.
Baǵdarlamanyń artyqshylyǵy - paıyzdyq mólsherlemesi tómen, 5 paıyzyn memleket tóleıdi. Sonda biz aıyna 70 myń teńgedeı únemdeıdi ekenbiz. Buǵan deıin buryn paıdalanylǵan páterlerdi qarap júretinbiz, endi mine ózimizdiń jap-jańa úıimiz bar», - deıdi Anna Súıinbaeva.
«Nurly jer» baǵdarlamasy boıynsha ıpotekalyq qaryzdardy sýbsıdııalaýǵa jyl saıyn 10 mlrd teńge bólinedi. Boljam boıynsha bul bastapqy baspana satyp alý kezinde 120 mlrd teńge bolatyn 8 myń qaryzdy qamtıdy. Osylaısha «Nurly jer» baǵdarlamasyn júzege asyrý elimizdegi turǵyn úı qurylysynyń damýyna qarqyn bermek.
