Atyraýda Nurlan Balǵymbaevty sońǵy saparǵa shyǵaryp saldy

Qoshtasý sharasynda QR Premer-Mınıstri Kárim Másimov Qazaqstan Prezıdenti Nursultan Nazarbaevtyń kóńil aıtý hatyn oqydy.

Dına Nurpeıisova atyndaǵy Mádenıet úıinde ótken qoshtasý sharasyna myńnan astam adam qatysty. Nurlan Balǵymbaevty sońǵy saparǵa shyǵaryp salýǵa úkimet músheleri, senatorlar, Parlament depýtattary, munaı-gaz kompanııalarynyń basshylary, qoǵam ókilderi, ardagerler keldi.

Burynǵy QR Premer-Mınıstri Nurlan Balǵymbaev 68-ge qaraǵan shaǵynda Atyraý qalasynda 14 qazanda dúnıeden ótti.

Balǵymbaev Nurlan Ótepuly 1947 jyly Atyraý qalasynda týǵan.1973 jyly Qazaq polıtehnıkalyq ınstıtýtynyń munaı jáne gaz fakýltetin taý-ken ınjeneri mamandyǵy boıynsha bitirdi.

1992-1993 jyldary Massachýsets ýnıversıtetiniń tyńdaýshysy boldy.

Eńbek jolyn Atyraý (qazirgi Mańǵystaý) oblysynyń Quryq kentinde burǵylaýshynyń kómekshisi (1964) bolyp bastaǵan.

1973-1977 jyldary "Mańǵyshlaqmunaı" birlestiginde jerasty jóndeý operatory, munaı shyǵarý jónindegi operator, skvajınalardy jerasty jóndeý sheberi.

1977 - 1992 jyldary Atyraý oblysyndaǵy Aqqystaý óndiristik qyzmet kórsetý bazasy bastyǵynyń orynbasary, "Embimunaı", "Aqtóbemunaı" birlestikteriniń bas ınjeneri, KSRO Munaı jáne gaz ónerkásibi mınıstriginiń Bas basqarmalarynda bastyqtyń orynbasary qyzmetterin atqardy. Odan keıin AQSh-tyń Massachýssets ýnıversıtetinde oqyp, munaı óndirisiniń álemdik ozyq tájirıbelerin is júzinde meńgerý úshin "Shevron" kompanııasynda jumys istedi.

1994-1997 jyldary QR Munaı jáne gaz ónerkásibi mınıstri, "Qazaqoıl" ulttyq munaı-gaz kompanııasynyń prezıdenti boldy.

1997 - 1999 jyldary Qazaqstan Respýblıkasy premer-mınıstri retinde qyzmetin atqardy.

1999 jyldan "Qazaqoıl" ulttyq munaı kompanııasynyń prezıdenti, Qazaqstan úkimetiniń múshesi.

2002 jyldan - «Qazaqstandyq munaı ınvestıtsııalyq kompanııasy» AQ prezıdenti.

2007 jyldan - QR Prezıdentiniń keńesshisi, Kaspıı teńizi resýrstaryn paıdalaný máseleleri jónindegi Qazaqstannyń arnaıy ókili.

2009 jyldyń jeltoqsanynan beri - «QazMunaıGaz» salynyp jatqan kásiporyndarynyń ákimshiligi» JShS bas dırektory qyzmetin atqardy. Balǵymbaev - elimizdiń munaı jáne gaz ónerkásibin zaman talabyna saı damytyp, qazba baılyqtardy tıimdilikpen ıgerip, halyq ıgiligine jaratý jónindegi iri jobalardy jasaý isine tikeleı aralasyp, uıytqy bolǵan tulǵa. Úkimet basshysy retinde áleýmettik saladaǵy reformatorlyǵymen, otandyq taýar óndirýshilerge múmkindiginshe qoldaý kórsetý baǵytyn ustanýymen erekshelendi. 1-dárejeli "Barys" ordenimen marapattalǵan (1999).