Atyraýda nóser jaýynnan keıin jeti úı men 25 kósheni sý basty
ATYRAÝ. QazAqparat – Atyraýda nóserden keıin 7 turǵyn úı men 25 kóshe jańbyr sýynyń astynda qaldy, dep habarlaıdy QazAqparat.
Oblystyq tótenshe jaǵdaılar departamenti qoǵammen baılanys tobynyń málimetine súıensek, 10 mamyr saǵat 21:00-ge deıin 7 jeke turǵyn úı, 15 aýla men 25 kósheni jańbyr sýy basqany anyqtalǵan.
«Tolassyz nóser jaýynnan Atyraý qalasynyń aýmaǵynda 36 mm ylǵal tústi. Bul – aılyq normadan artyq ylǵal. Nóserdiń saldarynan shahardaǵy turǵyn úıler men aýlalardy, kóshelerdi basqan sý deńgeıi 15 sm-ge deıin kóterilgen. Osy ýaqytqa deıin oblystyq tótenshe jaǵdaılar departamentiniń jáne jergilikti atqarýshy organnyń tehnıkalarymen 2 679 tekshe metr sý soryldy. Jańbyr sýyn sorý jumysy jalǵasyp jatyr. Osyǵan oraı arnaıy shtab quryldy», -dep málim etti departamenttiń qoǵammen baılanys tobynan.
Sý sorýǵa tótenshe jaǵdaılar departamentinen 28 qyzmetker, 6 tehnıka, 9 motopompa tartylǵan. Al, jergilikti atqarýshy organnyń uıymdastyrýymen «Arnaýlyavtobaza» JShS men «Atyraý oblysy Sý Arnasy» KMK tarapynan 78 adam, 54 vakýým kóligi, 2 motopompa shyǵarylǵan.
Kóshe tazalyǵymen aınalysatyn «Arnaýlyavtobaza» JShS dırektory Almas Іztileýovtiń aıtýynsha, jańbyr sýyn sorý jumysy eki aýysymmen júrgizile beredi.
Bul jumys tún mezgilinde de jalǵasyp jatyr.
Eske sala ketelik, buǵan deıin Atyraý kóshelerinen 40 myń tekshe metr sý sorylǵanyn habarlaǵan bolatynbyz.
