Atyraýda nóser sýyn aǵyzatyn káriz júıeleri salynýda
ATYRAÝ. QazAqparat - Atyraýda nóser sýyn aǵyzatyn alǵashqy káriz júıeleri salyna bastady, dep habarlaıdy «QazAqparat» HAA tilshisi.
«Nóserlik káriz júıesiniń qurylysy byltyr bastalǵan. Ol qalanyń eki ýchaskesinde - Jeńis saıabaǵy men «Qazposhta» bólimshesi aýmaǵynda jasaldy. Bıyl bul jumys 8 baǵyt boıynsha - Vladımırsk-Taımanov kósheleri, pravoslavıelik shirkeý aýdanynda, Avangard - 2 shaǵynaýdanynda, «Kaspıı» aıaldamasy mańynda, Qulmanov kóshesiniń boıynda, prokýratýra men «Renessans» qonaqúıleri aýdanynda salynady. Nóser sýyn aıdaý júıesiniń qurylysy mamyrda aıaqtalady dep josparlanýda. Sý belgili bir mólsherge jetkennen keıin drenaj qudyǵyna quıylyp, keıin káriz júıesine aǵatyn bolady», - dep habarlady Atyraý qalalyq ákimdiginiń baspasóz qyzmetinen.
Eske salaıyq, oblys ortalyǵynda topyraq saz balshyqty bolyp keledi. Saldarynan jaýyn sýy jer astyna sińbeı, shaǵynaýdandardy tutastaı basyp qalady. Atyraýda drenajdyq júıe joq.
Foto: © kanalizaciyainfo.ru
