Atyraýda nóser saldaryn joıý úshin jedel shtab quryldy
ATYRAÝ. QazAqparat - Atyraýda seısenbi keshkisin bastalyp, áli tolastamaǵan nóser saldaryn joıý boıynsha jedel shtab quryldy, dep habarlaıdy QazAqparat tilshisi.
«Nóser saldaryn joıýǵa «Arnaıy avto baza» JShS jáne «Atyraý Sý Arnasy» QMK ıeligindegi barlyq sý sorý tehnıkalary jumyldyrylǵan. Kóshelerdi sý basqany týraly alǵashqy aqparattar kelisimen-aq iske kiriskenbiz. Qazir qalada 37 vakýým mashınasy jumys istep tur, tańnan beri 1300 tekshe metr sý tartyldy. Tehnıkalardy eń aldymen oblys ortalyǵynyń eski bóligine jiberip jatyrmyz. Óıtkeni ol jaqtaǵy ǵımarattar buryn salynǵan», - deıdi shtab bastyǵy, Atyraý ákiminiń orynbasary Shákir Keıkın.
Onyń aıtýynsha, qazir qosymsha tehnıka izdeý sharalary júrip jatyr. Óıtkeni sınoptıkterdiń boljamyna qaraǵanda, jaýyn áli tolastamaıdy.
Ákimdikte «jedel jeli» telefony jumys istep tur. Oǵan qońyraý shalyp, kóshelerdi, balabaqsha, mektepter, aýrýhanalar sekildi áleýmettik nysan aýmaqtaryn sý basqany týraly habarlaýǵa bolady.
Avtor: A. Sokolov
