Atyraýda Nıgerııa azamaty psıhotropty zattardy saqtaǵany úshin 6 jylǵa sottaldy
Atyraý oblystyq qylmystyq ister jónindegi mamandandyrylǵan aýdanaralyq sotynda iri kólemde psıhotropty zattardy saqtaǵan Nıgerııa azamatyna qatysty qylmystyq is qaraldy. Sottalýshy QR Qylmystyq kodeksiniń 296-babynyń 4-bóligimen aıyptalǵan.
«2022 jylǵy shilde aıynyń basynda Nıgerııa Respýblıkasynyń azamaty E. Atyraý qalasynda áleýmettik jeli arqyly sotqa deıingi tergeý kezinde anyqtalmaǵan tulǵamen tanysqan. Odan esirtki zattaryn satyp alý týraly usynys túsip, E. kelisimin bergen. Budan soń basqa messendjerde «T» logınimen tirkelgen ózge tulǵamen baılanysyp, odan psıhotropty zattardyń jasyrylǵan oryndary týraly málimet alǵan. Keıin reseılik nomerli avtokóligimen iri mólsherdegi psıhotropty zattardy alyp, óz kóliginde jasyrǵany anyqtalǵan», -dep habarlady qylmystyq ister jónindegi mamandandyrylǵan aýdanaralyq sotynyń baspasóz qyzmeti.
Polıtsııa qyzmetkerleri byltyrǵy 20 shildede jedel-izdestirý is-sharalaryn júrgizip, Nıgerııa azamaty E.-ni ustaǵan. Onyń avtokóligin tintý kezinde júrgizýshi jaǵyndaǵy kilemshe astynan jalpy salmaǵy 4,29 gramm «mefedron (4-metılmetkatınon)» psıhotropty zaty tabylǵan.
Sottalýshy E.-niń kinási kýágerlerdiń jaýaptarymen, avtokólikti qarap-tekserý hattamasymen, saraptama qorytyndylarymen dáleldengen. Alaıda, Nıgerııa azamaty E. kinásin moıyndamaǵan.
Sot úkimimen sottalýshy E.-ge 6 jyl merzimge bas bostandyǵynan aıyrý jazasy taǵaıyndaldy.
Sot úkimi zańdy kúshine engen joq.
Eske sala ketelik, budan buryn Atyraýda alqabıler 21 adamǵa qatysty qylmystyq iske sheshim shyǵarǵanyn habarlaǵan edik.
Foto: azh.kz
