Atyraýda NCOC qyzmetkerinen koronavırýs tabyldy
ATYRAÝ. QazAqparat – Atyraýda NCOC qyzmetkerinen koronavırýs tabyldy, dep habarlaıdy QazAqparat.
Jergilikti «Aqjaıyq» gazetiniń jazýynsha, kompanııanyń «Vest Oıl» bazasyndaǵy qyzmetkerleriniń biri qaýipti indetti juqtyrǵan.
«NCOC aýtsorsıng nysandarynyń birinde jumys isteıtin kompanııa qyzmetkerinen COVID-19 synamasy oń nátıje kórsetkenin rastaımyz. Bul nysan óndiristik alańdar men kompanııa keńselerinen qashyqta ornalasqan. Qyzmetker hattamaǵa sáıkes oqshaýlandy. Jaqyn baılanysta bolǵan adamdardyń barlyǵy dereý anyqtaldy. Olardyń barlyǵy PTR synamasynan ótedi. Bul qyzmetker óndiristik nemese keńse qyzmetkerlerimen baılanysta bolmaǵan. Biz jaǵdaıdy muqııat qadaǵalap otyrmyz», - dep habarlady kompanııanyń baspasóz qyzmetinen.
Eske sala ketelik, budan buryn Atyraý qalalyq ákimdiginiń qyzmetkeri koronavırýs juqtyrdy.
