Atyraýda NCOC kompanııasy aýrýhanaǵa 1 mlrd teńgeniń jabdyǵyn syılady
ATYRAÝ. QazAqparat –Atyraýda #Bizbirgemiz qaıyrymdylyq aktsııasy aıasynda NCOC kompanııasy №2 oblystyq aýrýhanaǵa 1 mıllıard teńgeniń jabdyǵyn syılady, dep habarlaıdy QazAqparat.
Kompanııa baspasóz qyzmetiniń habarlaýynsha, osy aptada NCOC №2 oblystyq aýrýhanasynyń qarqyndy terapııa bólimine qosymsha medıtsınalyq qural-jabdyqtar, onyń ishinde ókpeni jasandy jeldetý apparattaryn, jeke saqtaný quraldaryn, sonymen qatar, Atyraý óńiriniń ózge de medıtsına mekemelerine antıbıotıkterdi, ınfýzııalyq eritindilerdi, zararsyzdandyrý quraldaryn tabystaǵan. Sondaı-aq, NCOC kompanııasynyń arnaıy shaqyrtýymen kelgen ulybrıtanııalyq dáriger atyraýlyq medıtsına qyzmetkerlerine COVID-19 koronavırýs ınfektsııasyn juqtyryp alǵan naýqastardy qarqyndy terapııamen emdeý boıynsha turaqty oqytý kýrstary men semınarlar ótkizip, keńes berýde.
Buǵan deıin NCOC aýrýhanaǵa jalpy quny 1 mıllıard teńgege jýyq qarjyǵa ókpeni jasandy jeldetý apparattaryn, shyǵyn materıaldaryn, ózge de qarqyndy terapııa jabdyǵyn alyp bergen edi.
«Biz osyndaı sharalardy aldaǵy ýaqytta da jalǵastyramyz. Jaqyn arada Atyraý jáne Mańǵystaý oblystarynyń medıtsına qyzmetkerleri úshin medıtsınalyq qural-jabdyq pen jeke saqtaný quraldarynyń taǵy bir partııasynyń jetkizilýin kútýdemiz» -deıdi NCOC kompanııasynyń basqarýshy dırektory Rıchard Hoýv.
